Rusiye ve Ukrayina arasında arbiy esirler ile deñişüv toqtadı demek mümkün. Deñişüv ile bağlı soñki haber 2023 senesi avgustnıñ 7-nde olğan edi. O vaqıt 22 ukrayinalı arbiy azat etilgen edi. Evel ise deñişmeler aman-aman er ay olıp keçe edi. Vaziyetni biraz añlamaq içün "Nastoyaşçeye vremâ" Cenk esirleri meseleleri ile oğraşqan Ukrayina koordinatsion ştabınıñ matbuat hızmetiniñ reberi Petro Yatsenko ile laf etti.
– Aytışmalar ola, çalışmağa devam etemiz. Amma kerçekten de yazdan başlap Rusiye deñişüv esnasını buzlattı demek mümkün. Evelkisi kibi endi olmay.
– Rusiye bu esnasnı ne içün buzlattı?
Biz deñişüvge azırmız, esirler sayısı çoq
– Bu sualge kimse cevam bilmey dep tüşünem, bunı Rusiye taarfından soramaq kerek. Biz deñişüvge azırmız, esirler sayısı çoq. Bizim yerlerimiz tola ve bu Rusiye esirlerini bizge kerek degil. Olarnı bizim imayecilerimizge büyük isteknen deñiştirir edik.
İmayecilerimizniñ tutulğan şaraiti bizimkine köre yaramay olğanını bilemiz. Biz Avropa memleketi olaraq Jeneva şartnamesine riayet etemiz.
Sebepler arasında Rusiyeniñ Ukrayina cemiyetini sarsıtmağa tırışqanı, arbiy esirlerniñ yaqınlarını Ukrayina tarafı istemegeni içün keçirilmegenine inandırmağa tırışqanı da ola bile. Kütleviy aktsiyalarğa çağıra. Ve böylece esirlerni ukrayinalılarğa daa bir tesir vastası olaraq qullana.
Ve daa bir sebep, öz arbiy esirleri olarnı meraqlandırmay. Olar Rusiye tarafı içün deñişüv materialıdır, top içün ettir.
Olar deñişüvlerni sozalar, türlü sebepler ve manialar uyduralar. Bu sene mayıs ayında bir qaç büyük deñişüv olıp keçti, şimdi ise soñkisi avgustnıñ 7-nde olğan edi. O vaqıt 22 adam azat etilgen edi.
Bu deñişmelerni keçirmemek içün türlü sebepler tapıla. Ne sebepten? Mümkün qadar uzatmaq, türlü propaganda kampaniyalarnı keçirmek maqsadınen.
– Rusiye tarafından deñişüvnen kim oğraşa?
– Rusiye tarafında mahsus koordinatsion strukturalar bar. Bizim ise arbiy esirler meseleleri ile oğraşqan koordinatsion ştabımız bar. Biz aytışmalar ve deñişüvniñ keçirilmesi ile oğraşamız.
Rusiyeniñ bunen meseleler ile oğraşqan ayrı bir organı yoq
Rusiyeniñ böyle bir strukturası yoq. Anda bunen Mudafaa nazirligi oğraşa. Prigojin daa sağ olğanda ÇVK "Vagner" ile aytışmaq kerek ola edi. Olarda da esirler bar edi. Rusiyeniñ bunen meseleler ile oğraşqan ayrı bir organı yoq.
– Ya arbiy olmağan esirlerge kelgende? Olarnen kim oğraşa?
– Olarğa kelgende, olar arbiy esir kibi sayılamaz. Çünki olar kombatantlar degil. Olarnı esir etip almaq mümkün degil. Rusiyeniñ iç bir sebep olmadan ukrayinlerni tutqanı bu qanunsız arekettir. Adiy adamlarnıñ vaziyet pek-pek mudafaa etilmyegen. Çünki arbiy esirlern ertemi-keçmi deñiştirmek mümkün olsa, adiy vatandaşlarğa kelgen vaziyet başqa.
Biz olarnı Rusiye arbiy esirlerine deñitirip olamaymız. Ukrayinanıñ bir qısmı alâ daa işğal altındadır ve rusiyeliler anda bizim vatandaşlarımıznı tutıp soñ öz arbiylerine deñiştirmege teklif ete bileler. Vatandaşlarımıznı Rusiye esirliginden azat etmek içün mehanazmler azırlaymız.
– Tafsilâtlıca mümkünmi?
– Biz faal şekilde bir şey yapmağa tırışamız. Kirılo Budanovnıñ reberligi altındaki koordinatsion ştab bu esnasnıñ ömürge keçirilmesi içün farklı deliller tapmağa tırışa. Trlü variantlar bar. Toqtamadan aytışamız.
Ve bu bayağı hoş olmağan ve tsinik bir esnastır
Tafsilâtnı bildirmeymiz. Aytışuv gruppalar bar. Olarnıñ em açıq em qapalı alâqa kanalları bar. Bu kostüm kiygen ve tögerek masa başında toplanğan bir körüşvge beñzemegen esnastır. Bu başqa türlü olıp keçe. Ve bu bayağı hoş olmağan ve tsinik bir esnastır, amma ukrayin tarafı bunı yapmaq mecburdır ve adamlarımıznı azat etmek içün yollar qıdırmağa tırışamız.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
