«Rusiye ikâyeleriniñ borazanı» – qırımtatar faalleri «Millet» telekanalınıñ işi aqqında

2022 senesiniñ neticelerine köre Rusiye akimiyeti «Millet» telekanalınıñ işini qayd etip, Kreml kontrolindeki Qırım ükümetiniñ gran-pri mukâfatını berdi. Qırım.Aqiqat, kanal esas seyircisi olacaq qırımtatarlar arasında kerçekten daa populâr oldımı, añlamağa tırıştı.

Rusiye akimiyeti işğal etilgen Qırımda keçirgen doquzıncı er yıllıq «Yılnıñ jurnalisti» mukâfatı çerçivesinde «Millet» telekanalına gran-pri berdi. Telekanal adından mukâfatnı «Millet» telekanalı ve «Vatan sedası» radiosınıñ baş müdiri Lilâ Vecatova aldı, o, merasimde «bizim içün, işdeşlerimiz içün bütün şaraitler yaratıldı», dep ayttı. «Millet» telekanalınıñ mühbiri Ayşe Şulakova da «Yılnıñ mühbiri» mukâfatına nail oldı.

Kreml kontrolindeki Qırım ükümetiniñ reisi Yuriy Gotsanük «Millet» telekanalınıñ mühbirlerine teşekkürler bildirip, «ğarp media resurslarına» qarşı çıquvda qoşqan isselerini qayd etti.

«Ğarp media resurslaru büyük iş yapa, Rusiye halqını içinden bölmek içün televideniye, içtimaiy ağlar, gazeta ve mecmualar vastasınen sahte malümat tarqatıla. Olmaz! Ne içünmi? Çünki namuslı ve pek mesüliyetli iş yapqan ve insanlarnı aldatmağa bermegen, doğru ve adaletli malümat yetkizgen jurnalist, operatorlarımızğa minnetdarlıq sözlerimiz», – dep ayttı Gotsanük.

Qırımtatar faali Edem Dudakovnıñ fikirince, qırımtatarlarnıñ ekseriyeti «Millet» telekanalından nefret ete.

«Millet» telekanalı açıq propagandacı, mahsus hızmetlerniñ ve sahte Qırım ükümetiniñ vazifelerine köre çalışa. Kanalnıñ bu işi de qayd etilgen, dep tüşünem. Cenk olsa, cenk. Yani bu «emek» mukâfatı «qazanılğandır». Amma, akimiyetniñ rağbetlendirüvine baqmadan, (Moskva istegeni kibi) maqsadı olğan seyirciler arasında olar, yımşatıp aytsam, nefret besley», – dep izaatladı vaziyetni Qırım.Aqiqatqa faal.

Qırımlı faal Emine İbraimova qayd etkenine köre, «Millet» telekanalı birinciden Rusiye akimiyeti içün çalışa.

«Millet» telekanalını çoqtan baqmayım. Başta bazı yayınlarnı baqa edim, soñra kanal Sergey Aksenovnıñ emrine köre çalışqanından emin oldım, qırımtatar seyircileriniñ istekleri olar içün müim degil. Bu kanalnıñ «Taygan» arslanlar parkında Oleg Zubkovnıñ matbuat konferentsiyasında qavğağa qarışqanı aqlımda, o vaqıttan berli bu kanal bir masqaralıq menim içün. Qırımtatarlar, atta bütün qırımlılar, Qırımda ATR telekanalınıñ işini hatırlay. Ne qadar parlaq ve keskin edi, anda istidatlar, jurnalistler çalışa edi, olarğa iş ustaları demek mümkün edi. Şimdi Qırımda jurnalist yoq, mence – tam propagandacılar qaldı. Aralarında ustalar olsa da, «qaideler boyunca oynamağa» mecbur, yoqsa işsiz qalırlar», – dep qayd etti Qırım.Aqiqatqa faal.

«Millet» telekanalınıñ esas seyircileri onı körmemezlikke urğanını Qırım.Aqiqatqa kefeli qırımtatar faali Osman Osmanov da tasdıqladı.

«Bu kanalnı baqmayım. Onı olsun dep yapqanlarını bilemiz, Qırımda qırımtatar milliy kütleviy haber vastaları bar dep kösterecek ediler. Amma seyircileri az. «VKontakte» içtimaiy ağında on dört biñ abunecisi, telegramda tek eki biñ abunecisi bar. Yani populârlıq aqqında aytmaq bile mümkün degil. Halqımız bu kanalnı sert bir söznen adlandıra», – dep tarif etti faal.

#LiberateCrimea halqara areketiniñ faali Ruslan Seydametovnıñ fikirince, «Millet» telekanalınıñ esas vazifesi – «qırımtatarlarnı işğalcilernen işbirligine boysundırmaq».

«Ne yazıq ki, «Millet» – Rusiye propaganda telekanalı, özüni qırımtatar telekanalı dep tanıta. Olar – propaganda meydançığı ve, Qırımdaki diger kanallar kibi, Rusiye ikâyeleriniñ borazanı ola. Baqmayım ve baqmaycam. Ayrı programmalarını kördim – yetti. Kütleviy haber vastaları arasında yerleri yoq. Qırım işğalden azat etilgen soñ olarnıñ faaliyeti toqtatılır, qabaatlılar cezasını çeker, dep ümüt etem. Olar mankurt, halqımıznı işğalcilernen işbirligine çağıra ve bunıñ içün «mukâfat» ala ya da, hristianlar aytqanı kibi, 30 serebrennik ala. Az qaldı. Cevap berecekler», – dep ayttı Qırım.Aqiqatqa vaziyet aqqında faal.

Ekspertler qayd etkenine köre, işğal yılları devamında, quvetli Rusiye propagandasına baqmadan, hususan «Millet» telekanalınıñ faaliyeti vastasınen propagandağa baqmadan, qırımtatarlarnıñ çoqusı Qırımdaki Rusiye saylavlarını körmemezlikke urmağa devam ete, yani Qırımnıñ Rusiye işğaline qarşı çıqqanlarını köstere. Qırımtatar Milliy Meclisiniñ reis muavini İlmi Umerov emin ki, «Millet» telekanalınıñ levhaları qırımtatarlarnıñ fikrini deñiştirip olamaz.

Qırımnıñ Rusiye parlamentiniñ halq diplomatiyası ve milletlerara munasebetler komiteti «iç siyaset, malümat ve bağ nazirligine Qırım televideniyesinde yüksek seviyeli hadim ve tehnik donatuv ile milliy yayın muarririyetini quruv meselesini baqmağa tevsiye etmege» qarar alğan edi. Qararda qırımtatar milliy muarririyetiniñ ğayrıdan tiklenmesi aqqında da aytıla, yani «Millet» telekanalınıñ faaliyeti, Rusiye akimiyeti istegeni kibi, semereli tanılmay.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.