Qırımtatar Milliy Meclisi 2021 senesi mayısnıñ 18-nde Ukrainanıñ vilâyet merkezleri ve şeerleriniñ meydanlarında resmiy eglence tedbirlerini keçirmemege çağırdı. Bu aqta Qırımtatar Milliy Meclisiniñ reisi Refat Çubarov derc etken beyanatında aytıla.
Qırımtatar Milliy Meclisi vilâyet memuriyetleriniñ reberlerini, köy, qasaba ve şeer yolbaşçılarını, köy, qasaba, şeer ve vilâyet şuralarınıñ deputatlarını 2021 senesi mayısnıñ 18-nde Qırımtatar halqı genotsidiniñ qurbanlarını añma künü keçirilmesine yardım etmelerine çağırdı.
Meclis 2021 senesi mayısnıñ 18-nde memuriy binalarda ya da yerli şura ve olarğa ait müessiselerde, kommunal ve devlet müessiselerinde olğan Ukraina devlet bayraqlarına qara matem şeritlerini baylamağa rica ete.
Meclis, reklama taşıyıcılarında 1944 senesi mayıs 18 qırımtatar halqınıñ faciasını aks etken grafik resimni yerleştirmege rica ete.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
