Letoniya Seyminiñ spikeri qırımtatar halqı sürgünligi qurbanlarınıñ añmasında iştirak etecek ola. Bunı o, Ukraina Yuqarı Radasınıñ reisi Dmıtro Razumkov ile ortaq brifing vaqtında bilirdi, dep haber etti Azatlıq Radiosı.
«Yarın qırımtatar halqı sürgünliginiñ yıldönümini qayd etmek ve Qırımda insan aqları vaziyetini muzakere etmek içün qırımtatarlarnıñ temsilcilerinen körüşüvni sabırsızlıqnen bekleyim», – dedi o.
Spiker, Letoniya 1944 senesi qırımtatar halqınıñ sürgünligini genotsid olaraq tanığanını qayd etti.
Bundan ğayrı o, Riga Ukrainadaki telükesizlik vaziyetini közetkenini ve «Rusiyeniñ Ukraina şarqında ve Qara deñizde vaziyetniñ turğunsızlaştırıluvı içün yapılğan areketlerini takbih etkenini» bildirdi.
Джамала и «ДахаБраха»: как в Херсоне прошел вечер-реквием памяти жертв геноцида крымских татар (фотогалерея)
Letoniya seymi Qırımnı işğalden qurtaruv ve halqara seviyede tanılğan sıñırlarda topraq bütünligini ğayrıdan tiklev ğayretlerinde Ukrainağa qol tutmaq içün «Qırım platforması» deputatlar gruppasını qurdı, dep bildirdi Ukraina Tış işler naziriniñ birinci muavini Emine Ceppar.
Hatırlatamız, mayısnıñ 18-nde Kyivde Qırım evinde Qırımtatar halqı genotstdiniñ 77-nci yıldönümine bağışlanğan instalâtsiya açılacaq.
Qırımtatar Milliy Meclisi 2021 senesi mayısnıñ 18-nde Ukrainanıñ vilâyet merkezleri ve şeerleriniñ meydanlarında resmiy eglence tedbirlerini keçirmemege çağırdı.
«Qırımtatar Maaliy Merkezi» qırımtatar halqı soyqırımınıñ 77-nci yıldönümine bağışlanğan «Soyqırımğa yoq!» adlı bir malümat kampaniyasını başlattı ve pervasız olmağan er kesni içtimaiy ağlardaki saifelerinde mahsus azırlanğan plakatlarnı paylaşıp, oña qoşulmağa çağırdı.
