Kyivde qırımtatar halqınıñ genotsid qurbanları añıldı. Genotsid qurbanlarınıñ hatıra abidesi ögünde keçirilgen merasimde Ukrayina ükümeti, diplomatik korpus, halqara teşkilâtlarnıñ vekilleri, din ve cemaat erbapları iştirak etti, dep bildire «Suspilne».
1944 senesi bir qaç kün içinde sovetler akimiyeti aman-aman 200 biñ insannı sürgün etti – dep hatırlattı Qırımtatar Milliy Meclisiniñ reisi Refat Çubarov.
«Sürgünlikniñ ilk yılları açlıq, hastalıq, katorga işleri ve komendant rejiminiñ sert şaraitlerinden qırımtatar halqınıñ 46%-ından ziyadesi elâk oldı. Bugün, genotsidniñ 81 yılından soñ ve 2014 senesi Qırımnıñ Rusiye işğalinen başlağan kütleviy qapaluvnıñ 11 yıllıq yañı dalğasından soñ, qırımtatarlar kene repressiya, siyasiy taqiplerge ve Qırımnıñ tamır halqına qarşı genotsid siyasetine oğray», – dep ayttı Çubarov.
Al-azırda 223 insan yarımadada apiste yata, dep qayd etti Ukrayina prezidentiniñ Qırım Muhtar Cumhuriyetindeki vekili Olğa Kurışko.
«Tış işler nazirliginden zenaatdaşlarımıznen beraber «Serbest Qırımğa mektüpler» teşebbüsini başlattıq, insanlar yardımğa muhtac olğanlarğa yaza. İmtianlarğa baqmadagn, qırımtatar halqı til ve adetlerini saqlap oldı», – dep qayd etti o.
Ukrayina prezidentiniñ ofis yolbaşçısınıñ muavini Olena Kovalskanıñ aytqanına köre, şimdi dünyanıñ qırımtatar sürgünligini genotsid olaraq tanıması müim.
«Böyle facialarnıñ qaytmasına imkân bermege aqqımız yoq. Şunıñ içün Ukrayina bütün seviyelerde – siyasiy, informatsion, halqara – 1944 senesiniñ sürgünliginiñ genotsid olaraq tanılmasını talap ete. Yuqarı Rada dünya ükümet ve parlamentlerine buña qoltutmağa çağırdı. Böyle qararlarnı alğan devletler – Litvaniya, Latviya, Estoniya, Poloniya, Çehiya, Kanadağa ve halqara teşkilâtlarğa minnetdarmız. Bütün dünyanı qoşulmağa çağıramız», – dedi o.
Aynı vaqıtta Refat Çubarov qırımtatar halqı genotsidiniñ tanılması tek tarihiy adalet degil, böyle cinayetlerniñ tekrarlanmaması içün bir adım ola, dep qayd etti.
«Hususan şimdi, qırımtatar halqı, serbestligi ve kimligi kene Qırımda Rusiye işğalci akimiyetiniñ telükesi altında qalğanda. Demografiyanı deñiştirmek, Qırımnıñ işğalini közge almamaq ya da onı işğalden çıqarmaqtan red etmekazat etilüvinden vazgeçmek – işğal etilgen topraqlardaki cinaiy siyasetke yol bermektir, bu insaniyetke qarşı cinayetni qoltutmaq ve genotsid qurbanlarınıñ hatırasını satmaq», – dep bildirdi Çubarov.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 200 biñden ziyade kişi sürgün etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
