İyünniñ 26-nda Qırım ve esas Ukrainanıñ memuriy sıñırından Qırımğa uçurılması planlaştırılğan qırımtatar bayrağı iyünniñ 15-nde Ukraina boyunca «seyaatqa çıqa» ve salı künü Donetsk vilâyetinden Kyivge keldi, dep bildire Qırımtatar Milliy Meclisiniñ reis muavini İlmi Umerov.
«Saat 9:00-dan 11:00-ge qadar bayraq Yuqarı Rada ögündeki meydanda açılacaq. Deputat, yardımcıları, Ukraina Yuqarı Radasınıñ hadimleri ve istegen er kesni tileklerini ve Qırım işğaline olğan munasebetlerini yazmalarına davet etemiz. Aqşam üstü bayraq Lvivge yollanılacaq, yarın saat 10:00-da ise T. Şevçenko abidesi ögündeki meydanda çalışacaq. İstegenler kelip, tileklerini yazsın», – dep bildirdi Umerov.
Onıñ malümatına köre, Lvivden bayraq Odesağa ketecek.
Qırımtatar bayrağında ilk tilekni qırımtatarlarnıñ milliy lideri Mustafa Cemilev yazdı.
Qırım.Aqiqat bildirgenine köre, Donetsk vilâyetinde Qırımtatar bayraq kününe balaban bayraq tikeler.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
