Donetsk vilâyetiniñ Kramatorsk şeerinde Qırımtatar bayraq kününe azırlanalar. Şeerliler, hususan «Beraber yeñermiz!» göñülli merkeziniñ iştirakçileri 16-9 metrlik balaban qırımtatar bayrağını tikeler, dep haber ete Qırım.Aqiqat mühbiri.
Bayraqnı Rusiye tarafından işğal etilgen Qırımğa iyünniñ 26-nda – Qırımtatar bayraq kününe uçurmağa planlaştıralar. Olarnı memuriy sıñırdan «Üçünci küç» teşkilâtınıñ göñüllileri gidrogennen toldurılğan ava kürrelerinen köterecekler. Aktsiya Qırımtatar Milliy Meclisiniñ desteginen keçirile.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
