Qırımtatar Milliy Meclisiniñ reis muavini İlmi Umerov iyünniñ 26-nda Qırım ve esas Ukrainanıñ memuriy sıñırından yarımadağa uçurılması beklenilgen qırımtatar bayrağında ilk tilekni qırımtatarlarnıñ milliy lideri Mustafa Cemilev yazdı, dep bildirdi.
«İyünniñ 26-nda Qırımğa uçacaq balaban qırımtatar bayrağı azır. Birinci tilekni Cemilev Mustafa ağa yazdı. Bayraqta yazılğan tilekler bayraq uçurılğanına qadar toplanacaq. Meclisniñ destegini alğan gençlerniñ teşebbüsi başladı», – dep yazdı Umerov Facebookta.
Onıñ qayd etkenine köre, «bayraq bazı Ukraina regionlarına seyaat etip», soñunda memuriy sıñırdaki keçiş noqtalarından birine baracaq ve andan faaller onı Qırım tarafına uçuracaq.
Qırım.Aqiqat bildirgenine köre, Donetsk vilâyetinde Qırımtatar bayraq kününe balaban bayraq tikeler.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
