İyül 27-sinde, bazarertesi künü, Kyivde üç yaşındaki Musa Süleymanovnıñ duası keçirildi. Balanı iyül 26-sında Aqmescit rayonınıñ Vasiyet qasabasında ölü taptılar. Duağa 120 qadar adam keldi. Bunı Qırım.Aqiqat mühbiri haber etti.
Duağa kelgenlerniñ arasında qırımtatar halqınıñ lideri Mustafa Cemilev, Qırımtatar Milliy Meclisiniñ reis müavinleri Ahtem Çiygöz ve İlmi Ümerov, Qırımtatar resurs merkeziniñ reisi, Meclis azası Eskender Bariyev bar edi.
"Bugün biz mında dua keçirmek içün keldik, çünki tünevin küçük Musa Süleymanovnı taptılar ve bugün defin ettiler. Ve bugün biz, qırımtatarlar, musulmanlar kibi, bütün halqnen beraber Musa içün dua etmek içün mında toplandıq", - dedi qırımtatar faal İsmail Ramazanov.
İyül 27-sinde Aqmescit rayonınıñ Vasiyet (Stroganovka) köyünde, iyül 26-sında bir qaç künlük qıdıruvlardan soñ tapılğan üç yaşındaki Musa Süleymanovnen vedalaştılar.
Aqmescit civarındaki Mamaq (Stroganovka) köyünde iyülniñ 26-nda üç yaşında Musa Suleymanovnıñ cesedi tapıldı.
Oğlançıq iyülniñ 24-nde ğayıp oldı. Balanı Rusiye politsiyasınıñ hadimleri, kinologlar, Qırımdaki Rusiye Fevqulâde vaziyetler nazirliginiñ idare vekilleri ve «Liza Alert» teşkilâtınıñ göñüllileri qıdırdı.
Где Муса? Тысячи людей ищут пропавшего в Крыму мальчика (фотогалерея)
Qırım ve Aqyardaki Rusiye Tahqiqat komitetiniñ idaresi üç yaşında Musa Suleymanovnıñ iyülniñ 24-nde Aqmescit civarında Mamaq köyünde ğayıp oluvınen bağlı cinaiy dava açtı. Qırımnıñ Rusiye prokuraturası Rusiye Ceza kodeksiniñ 105-inci maddesiniñ 2-nci qısmınıñ «v» noqtasına istinaden – küçük bala öldürilüvi – cinaiy dava açtı.
Elâk olğan oğlançıq - cemaat jurnalisti, ekinci Aqmescit "Hizb ut-Tahrir dava"sınıñ iştirakçisi Ruslan Süleymanovnıñ oğlu.
