Kyivde “Qırım inciri” üçünci ukrain-qırımtatar edebiy festivali başlandı.
Qırım. Aqiqat canlı yayınlavnı köstere.
Fevtival dekabrniñ 26-nda “Kelecek içün keçmiş: öz közünen körgenlerniñ ikâyeleri nasıl etip hatıra medeniyetini yaratalar” adlı munaqaşadan başlandı. Spikerler arasında – qırımlı tarihçı, ATR telekanalınıñ alıp barıcısı Gülnara Bekirova, tarihçı, publitsist, “Tarihiy aqiqat” portalınıñ tesisçisi Vahtang Kipiani, jurnalist, “Mektüpler” leyhasının tesisçilerinden biri Naciye Femi ve jurnalist, “Tamırlar” leyhasınıñ muarriri Mavile Halil.
“Festival çerçivesinde munaqaşalar, iştirakçilerniñ eñ yahşı esesrleriniñ oquluvı, çıqışlar, edebiy-muzıkalı perfomanslar ve ğaliplerniñ mukâfatlndırılması olacaq”, – dep haber ettiler teşkilâtçılar.
2020 senesi "Qırım inciri" ukrain-qırımtatar edebiyat yarışında bıltır kibi 125 müellif iştirak etti. Olar em yazğan eserlerini, em tercimelerini yolladı. Umumen 284 iş keldi, dep bildire yarış teşkilâtçıları. Olarnıñ malümatına köre, 223 eser ukraince yazılğan, 25 eser qırımtatarca, 36 iş qırımtatarcadan ukraincege ve aksine tercime etildi.
Bıltır Aqmescitteki ekinci "Hizb ut-Tahrir davasınıñ" mabüsi Osman Arifmemetov ve Bağçasaraydaki ekinci "Hizb ut-Tahrir davasınıñ" mabüsi Server Mustafayev "Qırım inciri" ekinci edebiyat yarışı çerçivesinde "Söz serbestligi" nominatsiyasında mukâfat aldı.
“Memorial” aq-uquq qoruyıcı merkezi siyasiy mabsbler dep tanığan “Hizb ut-Tahrir davaları”nıñ iştirakçileri Server Mustafayev ve Vadim Siruk 2020 senesi "Qırım inciri" üçünci edebiyat yarışı finalistleriniñ qısqa cedveline kirgenler, dep haber eteler teşkilâtçılar.
«Qırım inciri» ilk yazıcılar yarışı 2018 senesi yazda keçti. Bütün Ukrainadan 135 müelliften 244 iş keldi.
