2020 senesi «Qırım inciri» ukrain-qırımtatar edebiyat yarışında bıltır kibi 125 müelli iştirak etti. Olar em yazğan eserlerini, em tercimelerini yolladı. Umumen 284 iş keldi, dep bildire yarış teşkilâtçıları.
Olarnıñ malümatına köre, 223 eser ukraince yazılğan, 25 eser qırımtatarca, 36 iş qırımtatarcadan ukraincege ve aksine tercime etildi.
Qırımtatarcadan ukraincege tercime etilgen müellifler arasında – klassikler Noman Çelebicihan, Umer İpçi, Yunus Qandım, Şakir Selim, zemaneviy müellifler Şükri Appaz, Şeryan Ali, Elmaz Bahşış, Seyran İbragim, Zeyneb İbraimova, Uriye Kadırova, Aliye Kenci-Ali, Seyare Kokça, Emine Usein, Tair Halilov.
Qırımtatarcağa tercime etilgen müellifler arasında – Taras Şevçenko, Aleksandr Dovjenko, zemaneviy müellifler Svetlana Diduh-Romanenko, Mila İvantsova, ve keçken sene «Qırım inciriniñ» finalisti olğan Natalya Smirnovanıñ povesti.
«İştirakçilerniñ coğrafiyası – Ukrainanıñ bütün regionlarıdır. Qırımdan Aqmescit, Bağçasaray, Keriç, Saq, Kezlev, Kefe, Sudaq, İçki, Qarasuvbazar ve olarğa yaqın yerlerden yarışqa işlerini yollağanlar oldı. Qayd etmeli ki, müelliflerimiz em büyük ve vilâyet şeerlerinde (meselâ, Kyiv, Dnipro, Odesa, Harkiv, Çerniğiv, Ujğorod), em vilâyet merkezleri olmağan yerlerde (Nova Kahovka, Novodnestrovsk, Oster, Kaluş) ve köylerde yaşay. Türkiye, Finlândiya, Almaniya ve Gürcistanda yaşağan iştirakçilerden de eserler keldi», – dep tarif ete teşkilâtçılar.
Qayd etilgenine köre, koronavirus pandemiyası da yarışqa tesir etti.
«Pandemiya yarışqa nasıl tesir etken olsa, Qırımdaki gumanitar buhran da insanlarnı tuta, çünki böyle zor zamanlarda ilham tapıp icat etmek qıyın ola. Kelecek sene qırımtatar metinleri çoq olacaq dep bekleymiz, 2020 senesiniñ adise-vaqialarına refleksiya olaraq», – dep qayd etti yarış teşkilâtçısı Alim Aliyev.
Oktâbr ayında «Qırım evi» «Qırım inciri. Demirci» kitabını online taqdim etti. Kitapqa 2019 senesiniñ «Qırım inciri» ekinci yazıcı-terciman yarışınıñ eserleri kirdi.
«Qırım inciri» ilk yazıcılar yarışı 2018 senesi yazda ötkerildi. Yarışqa bütün Ukrainadan 135 müellifniñ 244 işi keldi.
Bıltır Aqmescitteki ekinci «Hizb ut-Tahrir davasınıñ» mabüsi Osman Arifmemetov ve Bağçasaraydaki ekinci «Hizb ut-Tahrir davasınıñ» mabüsi Server Mustafayev«Qırım inciri» ekinci edebiyat yarışı çerçivesinde «Söz serbestligi» nominatsiyasında mukâfat aldı.
