Kyiv ilhaq etilgen Qırımğa Dnipro (Özü) suvunıñ teminatınıñ başlanması imkâniyetini muzakere etmey. Bunı "İnter" telekanalınıñ efirinde tış işler naziri Dmıtro Kuleba ayttı, haber ete "Ukrinform".
"Ukraina ilhaq etilgen Qırımğa Dnipro suvunıñ teminatınıñ başlanması imkâniyetini muzakere etmey. Bu mevzuda bütün uydurmalar, spekulâtsiya ve şübelerniñ toqtanmasını isteyim", - qayd etti Kuleba.
Onıñ aytqanına köre, şimdi Rusiyenen esirlerniñ boşatılması ve Normandiya formatından sammitniñ keçirilmesi aqqında muzakereler etile.
"Bu körüşüv aprelniñ soñunda olması içün çalışamız", - qayd etti Kuleba.
Cumaaqşamı künü Ukrainanıñ yañı baş naziri Denis Şmıgal Facebook saifesinde yazdı ki, Ukraina ükümeti ilhaq etilgen Qırımnı işğalden boşatılmağance, onı suv ile temin etip olamay.
Daa evel Aqmescit mekteplerinde suv qullanıluvı ilânsız sıñırlandı.
Fevralniñ 5-nde Moskva kontrolindeki Qırımnıñ suv hocalığı ve melioratsiya devlet komitetiniñ yolbaşçısı İgor Vayl, Aqmescitte içme suvu eñ çoq 90-100 künge yeter, dep bildirdi.
Daa soñra Qırımnıñ Rusiye ükümetiniñ yolbaşçısı Yuriy Gotsanük suv yete, dedi. Amma aynı vaqıtta qırımlılarnı «yarımada içün suv kibi emiyetli resursnı tüşünip qullanmağa» çağırdı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
