Ukraina ükümeti ilhaq etilgen Qırımnı işğalden boşatılmağance, onı suv ile temin etip olamay, yazdı Facebook saifesinde Ukrainanıñ yañı baş naziri Denis Şmıgal.
"Qararımız deñişmey: biz vatandaşlarımızğa suvnı bermek ister edik, amma yarımada işğalden boşatılmağance ve Ukraina terkibine qaytarılmağance bunı yapıp olamaymız", - yazdı Şmıgal martnıñ 6-sında.
O, ükümet ilhaq etilgen Qırımda qalğan ukrainler aqqında unutmağanını qoştı.
"Biz bu adamlarğa yarım etmege isteymiz. Biz olarnı qasevet etkenimizni duyğanlarını isteymiz. Kerçekten, tehnikiy sebepler ile adamlarğa ve arbiy bazalarğa ketecek suvnı bölmege çare yoq", - dedi nazir.
Daa evel Aqmescit mekteplerinde suv qullanıluvı ilânsız sıñırlandı.
Fevralniñ 5-nde Moskva kontrolindeki Qırımnıñ suv hocalığı ve melioratsiya devlet komitetiniñ yolbaşçısı İgor Vayl, Aqmescitte içme suvu eñ çoq 90-100 künge yeter, dep bildirdi.
Daa soñra Qırımnıñ Rusiye ükümetiniñ yolbaşçısı Yuriy Gotsanük suv yete, dedi. Amma aynı vaqıtta qırımlılarnı «yarımada içün suv kibi emiyetli resursnı tüşünip qullanmağa» çağırdı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
