Aqmescit mekteplerinde suv qullanıluvı ilânsız sıñırlandı. Qırım.Aqiqat mühbiriniñ bildirgenine köre, mecburiy tedbirler aqqında resmiy şekilde aytmaylar, amma sınıf reberleri ana-babalarğa mesac yazıp, «bugünden başlap balalarnı sılaq yavluq ve şingen antiseptiknen temin etmesini» talap ete, «çünki mekteplerde qol yuvmaq içün suv berilüvi sıñırlanacaq».
Bazı mekteplerde ana-babalardan çeçek içün suv ketirmelerini rica eteler.
Rusiye kontrolindeki Aqmescit memuriyetiniñ yolbaşçı muavini Tatyana Suhina Rusiye kütleviy haber vastalarına izaat berip, suvnı tutumlı qullanmaq içün onı bermemege ve çoq suv qullanğan mekteplerni cezalamağa planlaştırıla kibi malümatnı red etti.
Onıñ aytqanına köre, mekteplerde suvnı tutumlı qullanmaq ricasınen sınıf dersleri yapıldı.
Qırım.Aqiqat mühbiriniñ malümatına köre, Aqmescitte yaldav havuzları ve maşina yuvucıları toqtamayıp çalışmağa devam ete.
Fevralniñ 5-nde Moskva kontrolindeki Qırımnıñ suv hocalığı ve melioratsiya devlet komitetiniñ yolbaşçısı İgor Vayl, Aqmescitte içme suvu eñ çoq 90-100 künge yeter, dep bildirdi.
Daa soñra Qırımnıñ Rusiye ükümetiniñ yolbaşçısı Yuriy Gotsanük suv yete, dedi. Amma aynı vaqıtta qırımlılarnı «yarımada içün suv kibi emiyetli resursnı tüşünip qullanmağa» çağırdı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
