ABD Ukraina meseleleri devlet departamentiniñ mahsus vekili Kurt Volker, Rusiye Qırımnı Ukraina nezareti altına qaytarır, dep inana. Bunı o, "TSN.Tıjden" programmasına bergen intervyüsinde ayttı.
Volker, Rusiye Qırımnı Ukrainağa qaytaracağına inanamı, jurnalistniñ sualine, o: "Ebet, ebet, men inanam. Biz bunı Baltiya memleketlerinde kördik. Sovet Birligi, 40 yıllıq işğalden soñ olarnıñ mustaqilligini qaytardı. Ğarp, Amerika Qoşma Ştatları, başqa memleketler, öz fikrinde turıp, bu devletlerniñ Sovet Birligine qoşulmasını tanımay edi. Aynı öyle biz Qırım içün tüşünemiz - biz Rusiyeniñ Qırım işğalinen razı olmamız".
AQŞ vekili, ukrain yarımadanıñ işğalden boşatıluvınıñ müddetini tahmin etip olamay, dep ayttı.
Bundan evel Volker, Qırım ilhaqı içün Rusiyege qarşı sanktsiyalar, yarımada işğalden boşatılmağance, ükümsürecegini ayttı.
2019 yılı iyün ayında Avropa Birliginiñ Şurası Qırım ve Aqyarnıñ ilhaqı neticesinde Rusiyege qarşı kirsetilgen sanktsiyalarnı uzatmaq qararını aldı.
Hususan, Qırım mahsulatını satılması, Qırımğa Avropa yatırımı yapılması, anda köçmemezlikniñ satın alınması, hızmet berilmesi, bizneske para ayırılması yasaqtır.
