Ukrain diplomatları, avgust ayına planlaştırılğan «Qırım platforması» sammitinde ABD-niñ «mıtlaqa» iştirak etecegine dair kefalet aldılar. Bunı Azatlıq Radiosına Ukraina Tış işler naziri Dmıtro Kuleba bildirdi.
«Bizni ABD-niñ mıtlaqa iştirak etecegine inandırdılar. Bilesizmi, balalıqta doğğan kününe davet etesiñ, saña deyler: kim daa olacaq? ABD-ge baqqan çoq memleket bar. Ve olar ABD-niñ kesen-kes cevabını bekleyler. Olar kelmege azır olğanını bilemiz, amma böyle bir diplomatik oyun bar. Şunıñ içün biz kerçekten sabırsızlıqnen bekleymiz (resmiy tasdıqnı – muar.)», – dedi Ukraina TİN başı.
Dmıtro Kuleba, Qırımnıñ taqdirine lâqayt olmağan er kes içün «Qırım platformasınıñ bir muvafaqiyet qazanması müim olğanını qayd etti.
«Rusiyeniñ TİN-nde vazifesi «Qırım platforması» sammitini «bozmaq» olğan bir gruppa faaliyet köstergenini ayta bilemiz. Bu teşebbüsni pek ciddiy qabul eteler. Ukrainada bu, sadece resmiyetçiliktir, dep aytqanda, Rusiyede «Qırım platformasını» kerçek bir telüke köreler ve oña qarşı areket eteler», – dep qayd etti nazir.
«Qırım platforması» parlament fraktsiyalarara birleşmesi Qırım ile bağlı qanun leyhalarını azırlay. Yuqarı Rada olarnı mayısnıñ 18-ne ve avgustnıñ 23-ne qadar muzakere etecek ola. Bunı «Ses» fraktsiyasından Ukraina millet vekili Rustem Ümerov aytıp berdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
