«Qırım platforması» parlament fraktsiyalarara birleşmesi Qırım ile bağlı qanun leyhalarını azırlay. Yuqarı Rada olarnı mayısnıñ 18-ne ve avgustnıñ 23-ne qadar muzakere etecek ola. Bunı «İnterfak-Ukraina» agentligine «Ses» fraktsiyasından Ukraina millet vekili Rustem Ümerov aytıp berdi.
«Biz diger fraktsiyalarnıñ temsilcilerinen beraber mayıs 18-ne ve avgustnıñ 23-ne qadar işke tüşürmege istegenimiz qanun leyhalarınıñ cedvelini azırladıq. Şartlı olaraq, olarnı «Qırım platforması» qanun leyhaları dep adlandırdıq. Şimdi bu qanun leyhalarını azırlaymız ve ümüt etem ki, bularnıñ bir qısmı yaqın kelecekte qabul etilecek», – dedi Ümerov.
Ayrıca qayd etti ki, bu cedvelge 20-ge yaqın qanun leyhası kirsetilecek.
«Olardan tamır halqlar, Qırımtatar halqınıñ statusı ve Qırım meseleleri ile bağlı Ukraina Anayasasına deñişmeler kirsetilüvi aqqında ilk üçüni azırladıq. Bundan ğayrı daa suv teminatı, siyasiy mabüsler, «Qırım» serbest ticaret mıntaqasınıñ lâğu etilmesi aqqındaa da fikirler bar. Angi teşebbüslerniñ qabul etilüvi mayısnıñ 18-den evel, angisiniñ ise avgustnıñ 23-den evel daa üstün olğanı aqqında parlamentteki zenaatdaşlarımız, Nazirler kabineti ve Prezident ofisi ile beraber qarar alacaqmız», – dep qayd etti o.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
