Qırım meselesi BMT-niñ deñişmelerge ihtiyacı olğanını açıq şekilde köstere, dep bildirdi Ukraina TİN başı Dmıtro Kuleba. Bunı o «Ukrinform» neşriniñ saytındaki blogunda yazdı.
«O (BMT) halqara turğunlığını ve nizamını desteklemek içün tesirli, printsipial, semereli bir teşkilât olmalıdır. BMT-niñ vazifesi halqara uquqnı yoq etmek ve imperiya ambitsiyalarnı ombrge keçirmek içbn arbiy küç qullanmaq ıntıluvlarğa qarşı turmaqtır. Yarım asır evelsi Rusiye şairi Stanislav Kunâyev dedi: "Eyillik yumrıqlı olmalı". Prezident Zelenskıy tam bunı yapmağa çağırdı: BMT uyanıp "yumruqlı eyillik" olmalı», – Zelenskıynıñ BMT BA çıqışını tefsir etip dedi Kuleba.
Nazir, yañı telükeler yalıñız aza devletlerden degil, teşkilâtlarnıñ özünden de iç islâatlarnı talap ete, dep qayd etti.
Ukraina TİN başı Dmıtro Kuleba işğal etilgen Qırım meselesi sırf Ukrainanıñ degil, global meseledir, dep bildirdi.
Ukraina prezidenti Volodımır Zelenskıy New Yorktaki BM Baş Assambleyasınıñ 76-ncı sessiyasında çıqışta bulunıp, işğal etilgen Qırımdaki vaziyet aqqında tarif etti.
Zelenskıy BM Baş kâtibi Antonio Guterres ile körüшип, Qırımda, Donbasta ve Rusiyede tevqif etilgen 450 ukrainniñ azat etilmesinde yardım etmesini istep cedvel berdi.
BM Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
