Ukrayina prezidenti Volodımır Zelenskıy iyülniñ 7-nde İstanbulda Türkiye prezidenti Recep Tayyip Erdoğan ile ortaq matbuat konferentsiyası vaqtında, Ukrayinanıñ "esirlerimizni, siyasiy mabüslerimizni azat etmek içün" çalışqanını bildirdi. Onıñ sözlerine köre, bütün cedveller ortaqlarda bar eken. Amma şimdilik iç bir netice olmağanını köz ögüne alaraq, bunıñ aqqında tafsilâtlı malümat bermege yañlış olur, dep bildirdi Zelenskıy.
Qaç siyasiy mabüs ve cedvel bar?
Ukrayina Prezidentiniñ Qırım MC daimiy temsilcisi Tamila Taşevanıñ sözlerine köre söz bir cedvel aqqındadır. O, uquq qoruyıcı teşkilâtlar ve ukrayin esirleriniñ ve siyasiy mabüsleriniñ azat etilmesi ile oğraşqan bütün Ukrayina devlet organları ile kelişilgen.
Al-azırda 180 siyasiy mabüs bar, olardan 117-si qırımtatardırTamila Taşeva
"Al-azırda 180 siyasiy mabüs bar, olardan 117-si qırımtatardır. Bu cevlellerni biz uquq qoruyıcı teşkilâtlar ile tasdıqlamağa tırışamız. Ukrayina Yuqarı Radasınıñ insan aqları vekâletlisiniñ Ofisi mle deñişemiz, bu Prezident Ofisinde olğan cedveller. Bu yekâne bir cedveldir", - dep bildirdi Tamila Taşeva.
Bu cedvelde Qırımtatar Milliy Meclisi reisiniñ birinci muavini Nariman Celâl, vatandaş jurnalisti İrına Danılovıç ve qırımtatar qızı Leniye Umerova bar.
"Azov" polkunıñ komandirleriniñ azat etilmesi deñişüv ceryanına nasıl tesir etecek
"Azov" polkunıñ komandirleri esirlikten Rusiye ve Türkiye arasında yapılğan bir añlaşma ile azat etilgen ediler. Cenkniñ soñuna qadar Türkiyede qalacaqları ise şart edi. Rusiye bu qarardan menün olmağanını bildirdi. Rusiye prezidentiniñ matbuat kâtibi Dmitriy Peskov RİAN "Novosti" neşrine intervyü berir eken "Moskva yüz bergenler ile bağlı añlatmalar beklegenini ve kelecekteki añlaşmalar vaqtında bunı köz ögüne alacağını" bildirdi.
Tamila Taşeva bunıñ siyasiy mabüslerniñ azat etüv ceryanına tesir etmeycigine ümüt ete.
"Mesele şunda ki, bu bizim vatandaşlaramız, ve olarnıñ episi azat ve Ukrayinada olmaqnı aq eteler. Bu uzaq bir esnas edi, şu cümleden "Azov" polkunıñ komandirlerini de evge qaytarmaq edi. Şunıñ içün şimdi bir şey aytmaq qıyın. Erdoğannıñ ukrayin siyasiy mabüslerini azat etüv meselesinde noqta-i nazarı qayti olacağına ümüt etem ve iç bir şey deñişüv esnasına tesir etmez", - dep bildirdi Taşeva.
Tamila Taşeva "siyasiy mabüslerniñ azat etilüv mevzusında Rusiye ile muzakere vazifesini ustlerine alacak" halqara ortaqlarnı celp etmek mümkün olacağına işana.
Qırımlı siyasiy mabüslerniñ soñki azat etilmesi Rusiyeniñ Ukrayinağa qarşı büyük istilâsı başlamazdan evel, 2019 senesi olğan edi. Bundan soñ iç bir azat etüv olmağan. İşğalci memleket yalıñız yañı davalar uydura ve siyasiy mabüslerniñ cedveli arta. Azatlıqqa yalıñız "cezasını çekkenler" çıqa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
