Link açıqlığı

Saatnıñ esas haberi

Kreml, Türkiyeniñ Qırımda keçirilgen Devlet Duma saylavlarınıñ rey berüvini tanımamasını «qabul etmey»


Rusiye prezidentiniñ matbuat kâtibi Dmitriy Peskovnıñ
Rusiye prezidentiniñ matbuat kâtibi Dmitriy Peskovnıñ

Kreml, Türkiyeniñ işğal etilgen Qırımda Devlet Duma saylavlarınıñ neticelerini tanımağanını tefsir etti.

«Böyle beyanatlarnı (Qırımda saylavlarnıñ neticelerini tanımama – QA) qabul etmeymiz ve Türkiye zenaatdaşlarımızğa bunı açıq-açıq aytamız. Qırım mevzusı – fikirlerimiz diametral şekilde farqlı olğan bir mevzu. Türkiyeniñ böyle fikirleri yazıqsındıra, amma vaqıt keçkeninen siyasiy irade kösterilir ve Türkiye aqiqat ve kerçek vaziyetke emiyet berip, fikrini deñiştirir, dep ümüt etemiz», – dep bildire Rusiye prezidentiniñ matbuat kâtibi Dmitriy Peskovnıñ aytqanlarını TASS agentligi.

Kreml vekili, Türkiye Rusiyeniñ ortağı ola ve «fikirleri zıt olğan meseleler eki taraflı munasebetlerniñ inkişafı ve bir sıra regional meselelerde işbirligi içün mania olmamalı», dep bildirdi.

Bundan ğayrı, Peskov, Rusiye «Qırımnen bağlı fikrini deñiştirmeycek, bu mesele er angi muzakere çerçivesinde degil», dep kene qayd etti.

«Rusiye tarafı Qırımnen bağlı fikirlerini deñiştirmeycek. Qırım ola bilecek er angi muzakere tışında qala. Mında subetdeşlerimizge qırımlılarnıñ saylavını añlatmaq kerek ve bunı yapacaqmız», – dedi Peskov.

Rusiye Tış işler nazirliginiñ spikeri Mariya Zaharova, Rusiye Türkiye Tış işler nazirliginiñ beyanatını «diqqatsız qaldırmaycaq», dep bildirdi.

Ankara, Moskvanıñ beyanatlarını daa tefsir etmedi.

Türkiye Tış işler nazirligi derc etken beyanatta Ankara işğal etilgen Qırımda Rusiye Devlet Dumasınıñ saylavlar neticelerini tanımaycaq, dep bildirdi.

Daa evel berilgen malümatqa köre, Qırımda keçirilgen Rusiye Devlet Duma saylavlarınıñ neticelerini ve rey berüv esnasını Büyük Britaniya, ABD ve AB memleketleri tanımay.

Sentâbrniñ 17-nde Ukraina Tış işler nazirligi Qırımda teşkil etilgen Rusiye saylavlarına ve işğal etilgen Donetsk ve Lugansk vilâyetleri rayonlarınıñ rey berüvge celp etilmesine qarşı narazılıq bildirdi.

Ukraina milliy telükesizlik ve mudafaa şurası işğal etilgen Donbastan ve Qırımdan kösterilgen 33 namzetke qarşı sanktsiyalar kirsetti.

Ukraina milliy telükesizlik ve mudafaa şurası Qırımda ve Donbasta Rusiye Devlet Duması saylavlarında komissiya erkânına kirgen, teşviqatçılar, namzetler ve közeticilerge qarşı sanktsiyalar kirsetmege vade ete.

Rusiye Qırımnı Rusiye toprağı dep saya ve, Rusiye prezidentiniñ matbuat kâtibi Dmitriy Peskov 2016 senesi bildirgenine köre, halqara toplulıqnıñ işğal altındaki yarımadada saylavlarnıñ keçirilüvine bergen cevabına «qulaq asmay».

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG