Rusiye, Türkiye Tış işler nazirliginiñ işğal altındaki Qırımda keçirilgen Devlet dumasınıñ saylavlarını tanımama beyanatını «diqqatsız qaldırmaycaq». Bu aqta Rusiye Tış işler nazirliginiñ resmiy vekili Mariya Zaharova ayttı.
«Türkiye Qırımnıñ Rusiye Federatsiyasınıñ suveren qısmı olğanını yahşı bile ve böyle beyanatlarnı bir vaqıt diqqatsız qaldırmağanımıznı bile», – dedi Zaharova «Solovyev Live» Youtube-kanalınıñ yayınında.
Onıñ aytqanına köre, Moskva «eki taraflı munasebetlerniñ inkişafına fayda ketirmeycek hulâsalar çıqara».
Türkiye Tış işler nazirligi derc etken beyanatta Ankara işğal etilgen Qırımda Rusiye Devlet Dumasınıñ saylavlar neticelerini tanımaycaq, dep bildirdi.
Daa evel berilgen malümatqa köre, Qırımda keçirilgen Rusiye Devlet Duma saylavlarınıñ neticelerini ve rey berüv esnasını Büyük Britaniya, ABD ve AB memleketleri tanımay.
Sentâbrniñ 17-nde Ukraina Tış işler nazirligi Qırımda teşkil etilgen Rusiye saylavlarına ve işğal etilgen Donetsk ve Lugansk vilâyetleri rayonlarınıñ rey berüvge celp etilmesine qarşı narazılıq bildirdi.
Ukraina milliy telükesizlik ve mudafaa şurası işğal etilgen Donbastan ve Qırımdan kösterilgen 33 namzetke qarşı sanktsiyalar kirsetti.
Ukraina milliy telükesizlik ve mudafaa şurası Qırımda ve Donbasta Rusiye Devlet Duması saylavlarında komissiya erkânına kirgen, teşviqatçılar, namzetler ve közeticilerge qarşı sanktsiyalar kirsetmege vade ete.
Rusiye Qırımnı Rusiye toprağı dep saya ve, Rusiye prezidentiniñ matbuat kâtibi Dmitriy Peskov 2016 senesi bildirgenine köre, halqara toplulıqnıñ işğal altındaki yarımadada saylavlarnıñ keçirilüvine bergen cevabına «qulaq asmay».
