Martnıñ 16-sından başlap Aqmescitte Vernadskiy adına Qırım Federal Universitetinde COVID-19 koronavirusınıñ yayılması sebebinden distantsion oquş rejimi kirsetile.
Bunı RİA "Novosti Krım" matbuatına oquv yurtunıñ matbuat hızmeti haber etti.
"Bu qararnı tünevin gece aldıq. Bütün talebelerimizge evde qalmağa tevsiye etemiz", - dediler universitetniñ matbuat hızmetinde.
Koronavirus infektsiyasınıñ tarqalması sebebinden Aqmescitteki Tezikov adına tsirk işini vaqtınca toqtattı.
Martnıñ 12-sinde Dünya sağlıq teşkilâtı koronavirus pandemiyasını ilân etti.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
