Qırım eki aftadan berli koronavirusnen bağlı sıñırlav tedbirleri şaraitlerinde yaşay. İlk hasta resmiy şekilde martnıñ 21-nde qayd etildi. Bu vaqıt devamında Qırımda hastalarnıñ sayısı 18, Aqyarda 5 oldı, dep bildire Rusiye kontrolindeki yerli akimiyet. Qırım.Aqiqat, yarımadada tarqalğan COVID-19 hastalığını taqip etmege devam ete.
Qırımda virus tapılğan ilk afta olğan vaziyet aqqında mında oqumañız mümkün. Şimdi ise bu afta hastalıq dinamikasına dair malümat topladıq.
Qayd etemiz ki, Qırımda koronavirus tarqaluvınıñ raqamları tam olmaması mümkün, çünki ten 2014 senesi Qırımda qurulğan Rusiye akimiyet organlarınıñ malümatına esaslana. Olarnı Ukraina hızmetleri, halqara teşkilâtlar ve diger mustaqil menbalar tasdıqlamadı, çünki yarımadağa kirip olamay.
Ekinci aftada yerli akimiyeti daa üç yañı hasta aqqında bildirdi. Qırım memurları, hastalarnıñ büyük qısmı yarımadağa diger memleketlerden keldi, qalğan hastalar ise olarnen alâqada olıp hastalandı, dep israr ete. Daa 4,5 biñ kişi yuqunçqa oğrav şübhesinen tibbiy közetüv altında buluna.
Yañı tendentsiya
Birinci afta içinde Qırımda koronavirusnen hastalanğanlarnıñ sayısı 14 insan oldı. Olar «ketirildi», dep israr ete yerli akimiyet. Faqat, martnıñ 28-nden başlap, Qırımda yañı tendentsiya peyda oldı – yarımadada hastalanalar. O künü bir hasta qayd etildi. Qırımlı çetelden qaytıp, özüni tecrit etmegen hastanen alâqada oldı, dep bildire Qırımdaki Rospotrebnadzor idaresi.
Qırımnıñ Rusiye akimiyeti daa bir koronavirus hastası aqqında martnıñ 31-nde ilân etti. «Yañı hasta – evdekilerden hastalandı. Böylece, 16 hasta bar. 14-ü ketirildi, 2-si – yerli», – dep bildirdi Rusiye kontrolindeki Qırım yolbaşçısı Sergey Aksenov.
Onıñ aytqanına köre, memurlar hastanıñ alâqada olğan insanlarnı bilip oldı – 30 kişi bar. Olarnı tecritke yollağanlar.
Daa eki yañı hasta aqqında aprelniñ 3-nde belli oldı. Sergey Aksenovnıñ malümatına köre, bir hasta – Moskvadan kelgen qırımlı, ekincisi – soy-soplarına kelgen Moskva sakini. «Böylece, Qırımda 18 koronavirus hastası qayd etildi, 16-sı ketirildi, eki kişi yerli, bir qorantadan ola», – dedi o.
Bu afta soñunda koronavirus telükesi sebebinden Qırımda aman-aman üç biñ kişi közetüv altında qala. 68 insan hastahanede buluna. 15 kişi observatorlarğa tecrit etildi.
Rusiye kontrolindeki Qırım Sağlıq naziri İgor Çemodanov aprelniñ 3-nde koronavirustan tüzelgen ilk insanlar aqqında bildirdi. «Qırımda daa evel yañı koronavirus yuqunçı diagnozı tasdıqlanğan ilk hastalar hastahaneden çıqarıldı. Olarğa kerekli tibbiy yardım kösterildi. Koronavirus tedqiqi tekrar yapılıp menfiy netice alınğan soñ insanlar hastahaneden çıqarıldı», – dep haber etti o.
Qırım teneffüste
Qırımda qayd etilgen koronavirus hastalarınıñ sayısı eksilgenine baqmadan, yerli akimiyet yuqunç tarqaluvına qarşı tedbirlerni sertleştirdi. Yarımada akimiyetiniñ çoqusı organları uzaqtan çalışıp başladı.
Memurlar müessise reberlerini hadimlerni karantinge yollamalarına çağırdı. Esli-başlı qırımlılarğa ise evden çıqmamaları tevsiye etildi.
Qırımlılarnıñ karantin vaqtında kezintilerini sıñırlamaq içün regionlarda yalı, park ve kütleviy raatlıq yerleriniñ kirişleri qapatıldı.
Qırımda cemaat naqliyatınıñ iş qaideleri de deñiştirildi. Aprelniñ 1-nden itibaren Keriç köpründeki areket sıñırlandı. Anda Rospotrebnadzor, Rusiye uquq qoruyıcı organları ve Rusiye gvardiyası hadimleriniñ iştiraki ile yuqunsızlaştıruv kontrol noqtaları qoyuldı.
Qırımda musafirhane, otel, şifahane, pansionat ve diger turist yerleri qapatıldı. İyünniñ 1-ne qadar anda yerleştirüv yasaqlandı.
Hastahane ve «Tavrida» yolundan ğayrı, bütün qurucılıq işleri toqtatıldı.
Bunıñnen beraber Qırımda ealini özüni tecrit etüv tedbirleri aqqında haberdar etüv sisteması işletildi. Qırımlılarğa acele bir şey olmasa evden çıqmağa yasaq etildi.
«Karantin repressiyaları»
Nasıl olsa da, Qırımnıñ Rusiye akimiyeti karantinniñ yüzlernen bozuluvını qayd ete. Bu afta Qırımda özüni tecrit etmegen qırımlılar zornen observatorlarğa qapatıla. Rusiye uquq qoruyıcıları ABDden qaytqan soñ evde bulunğan, amma öz maşinasınen plâjğa barğan Kefe sakinine para cezasını berip, onı observatorğa zorlap yolladı.
Akimiyetniñ karantinni bozğan ve diger insannı hastalıqqa oğratqan qırımlını cinaiy mesüliyetke çekmek birinci ıntıluvı aqqında belli oldı. İnsanğa qarşı cinaiy dava açıldı. O, qabaatını tanımay. Advokatı Artem Pepanıñ bildirgenine köre, qırımlı özüni tecrit etüv rejimini bozmadı, bunı dört qoranta azasınıñ sağlığı yerinde olğanı isbatlay. Advokatnıñ Qırım.Aqiqatqa bergen malümatına köre, davanen bağlı tahqiqat daa başlanmadı, çünki qabaatlı özüni tecrit etüv rejiminde tedaviylevini daa bitirmedi.
Limon, zencefil ve paratsetamol qıtlığı
Qırımda yañı sıñırlavlar kirsetilgeninen azıq paalılaşa. İlk ihtiyac mallarınen beraber bu afta limon ve zencefil de paalılaştı. Zencefil 20 qat paalılaşsa da, peştahtalarda iç qalmadı.
Qırım memurları aphanelerde qalmağan paratsetamol aqqında da bildirdi.
«Paratsetamolnı ötmek kibi alalar. Bu malümat Uzaq Şarq, Sibirge qadar ketti. Yedek etip alalar, 20-30 dane. O, koronavirustan yardım etmey. Tek sıcaq tüşürmek içün kerek», – dep bildirdi Qırımdaki Roszdravnadzor idaresiniñ yolbaşçısı Vasiliy Klimov Qırım ükümeti yanındaki koronavirus tarqaluvına qarşı ştab toplaşuvında.
Onıñ aytqanına köre, Rusiye teslimatçılarınıñ bu ilâc fiyatını arttırğanı qayd etildi.
Aqyarnıñ sıfır statistikası ve «umumiy tecriti»
Rusiye kontrolindeki Aqyar akimiyeti bu afta şeerde bir koronavirus hastasını qayd etmedi. Resmiy malümatqa köre, anda keçken afta qayd etilgen beş hasta qala.
Şeerde tibbiy közetüv altında bulunğan insanlarnıñ sayısı da eksildi. Martnıñ 30-nda olarnıñ sayısı 2,9 biñ edi, aftanıñ soñuna yaqın ise – 1,5 biñden çoq insan oldı. Bir çoq insannıñ karantin rejimi bitkeni içün sayılmay, dep ayta memurlar.
Aprelniñ başından itibaren Aqyarda qoşma sıñırlav tedbirleri kene de kirsetildi. «Özüni tecrit etüv rejimi» çerçivesinde şeer yuqunç hastahanesiniñ ekimleri şeer sakinlerini evde qalmalarına çağırdı.
Şeerde eglence ve sport müessiseleri, cemiyet aşağan yerlerniñ faaliyeti toqtatıldı. Cemaat naqliyatına bedava minüv aqqı tek çalışqan ve mahsus kirişligi olğan pensionerlerde qala. Şeerde yahta ve katerlernen deñiz kezintileri de yasaqlana.
Sergey Aksenov ve Aqyar Rusiye ükümeti yolbaşçısınıñ vazifelerini vaqtınca eda etken Mihail Razvojayev koronavirus tarqaluvı ile küreş meselelerde «areketlerini zamandaşlaştırmağa» añlaştılar. Qırımlılar sıñırlav tedbirleri şaraitlerinde ne qadar yaşaycağını olar şimdilik aytıp olamaylar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
