Rusiye kontrolindeki Qırım akimiyeti gece klubları, diskoteka, kinoteatr, kinosalonı, bala odaları, bala eglence merkezleri ve diger işten boş vaqıt keçirilgen yerlerniñ faaliyetini toqtatmaq niyeti aqqında bildirdi.
Bu aqta martnıñ 25-nde Qırımda koronavirus yuqunçınıñ tarqaluvına qarşı operativ ştabınıñ toplaşuvında haber etildi.
«Nargile qaveleri, restoran, bar ve qavelerde nargile içilüvi yasaqlanacaq. Bu müessiselerge çalışmağanları içün Emek nazirligine ve İş hızmetine muracaat etmege teklif etemiz», – dep bildirdi Qırımnıñ Rusiye İçtimaiy emek nazirligi yolbaşçısı Yelena Romanovskaya.
Martnıñ 24-nde Rusiyedkki koronavirus yuqunçınen küreş operativ ştabı regionlarnıñ akimiyetlerine kinoteatr, gece klubları, diskoteka ve bala oyun merkezlerini qapatmağa, qave, bar ve restoranlarda nargile içilüvini yasaqlamağa tevsiye etti.
Martnıñ 24-nde Aksenov Qırımda altı yañı koronavirus hastası qayd etildi, dep ilân etti. Daa evel Qırımnıñ Rusiye akimiyeti ilk COVID-19 hastası bar dep tasdıqladı.
Aksenov, koronavirus tarqalğan memleketlerge barıp, bunı gizlegen insanlarğa qarşı cinaiy dava açılmasını talap etmege azır. O, yarımadağa Herson vilâyetiniñ memuriy sıñırından kirgen qırımlılar üzerinde monitoringni quvetleştirmege talap etti.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
