Rusiye akimiyeti, "Tavrida" trassası 81%-ğa azır, dep haber ete. Aynı vaqıtta Qırımnıñ rusiyeli ükümetiniñ reisi Yuriy Gonçar, inşaat işleriniñ tış icracısı Ao "VAD"-ğa qarşı iç bir şikâyet olmağanını ve "VAD" ileride de Qırım yollarınıñ qurulışına sımarışlarnı alacağını, ayta.
"Eñ büyük federal leyhalarında olğan "Tavrida" trassası, yekünlenmekke yaqınlaşa. Qırım başı ile (Qırımnıñ rusiyeli başı Sergey Aksönov - QA) yolnı aylanıp, inşaat işlerini teşkerdik. Bugünde-bugün trassa 81%-ğa azır. Kefe (Feodosiya) civarındaki Primorskiy qasabasından Qarasuvbazarğa (Belogorsk) qadar 85 kilometrlik arazide faal tarzda işler yapıla. Bu, tış icracısına iç bir şikâyet olmağan, er şey semereli ve cedvel boyunca yapılğan siyrek allardan birisidir. Yahşı nufzunıñ degeri büyüktir. Tamam bunıñ içün "VAD", Qırımda belediye ve rayon yollarınıñ yekâne qurucısı olacaq", - dedi Gonatsük.
Onıñ aytqanına köre, trassa qurulışı yerinde yerleşken topraq paylarınıñ qırımlılardan satın alınması problemalı bir mesele olıp qala.
"Yılnıñ soñuna qadar biz, bütün kerekli añlaşmalarnı imzalap, adamlarnen bu meseleni çezmelimiz", - dep qayd etti Qırım ükümetiniñ başı.
Rusiye tarafdarı olğan Qırım faal Lenur Usmanov, Qırım.Aqiqatqa tefsir bergende, becerilgen işniñ keyfiyeti aqqında netice çıqarmaq daa erte, dep ayttı.
Tek yolnı eki yıl qullanğan soñ ise, tış icracısınıñ iş keyfiyetinde emin ola bilirmizLenur Usmanov
"Becerilgen işlerniñ keyfiyeti aqqında aytmaq daa erte, çünki şimdilik yolnıñ bu qısmınıñ qurulışınıñ yalıñız körülme tarzında qiymet kese bilemiz. Tek yolnı eki yıl qullanğan soñ ise, tış icracısınıñ iş keyfiyetinde emin ola bilirmiz. Qırımlılar, Kefe trassasınıñ millionlarce rublege yapılğan tamirinden deral soñra süyrelip başlağanını daa yahşı hatırlay", - paylaştı faal.
Rusiye jurnalisti Oksana Yakubets, onıñ malümatına köre, "VAD" işhanesi Qırımda yol qurulışınıñ eñ yahşı kontraktlarını endi "elge keçirgenini" aytıp berdi.
"VAD" Qırım yol aqçalarına bayağı vaqıt uzana edi. Umumen, bu struktura ya da onen bağlı şirketler, Qırımnıñ eñ paalı leyhalarını öyle de zapt etti", - qayd etti jurnalist.
O, "Tavrida" trassasında çoq qaza olğanı içün, oña "ölüm yolu" degenlerini ve bu, trassanıñ eksiklerini köstere, dep qoştı.
Kerçek icra budjetniñ esaplağanına uymay. "Tavrida" "ölüm yolu"nda qazalarnıñ sayısı, bunı yahşı köstereOksana Yakubets
"İşniñ keyfiyeti, şübesiz, belediye unitar müessiseleriniñ (MUP) asfalt töşemesinden yahşıca, amma kerçek icra budjetniñ esaplağanına uymay. "Tavrida" "ölüm yolu"nda qazalarnıñ sayısı, bunı yahşı köstere. Aksönov, Qırım "qazanı" başında qalmaq içün, qıta şorbacılarını olğanı kibi piyazlay", - qayd etti jurnalist.
Rusiye içtimaiy palatasında çalışqan mimar ve cemaatçı Olga Veçerge köre, Qırımnıñ rusiyeli ükümeti, "VAD"nıñ yekâne tış icracısı olaraq saylanılğanını kerçek sebeplerini aydınlatmaz.
"Tecribeme köre, Qırım akimiyetiniñ iç bir sözüne inanmaq olmaz. Onıñ içün, Qırımda yekâne inşaatçını saylanuv kerçek sebepleri, büyük ihtimal ile, Gotsanükniñ aytqanınen bir kelmey", - dedi Qırım.Aqiqatqa cemaatçı.
"VAD" şirketini bu mesuliyetli vazifege lâyıq sayğan rusiye blogeri Aleksandr Gornıy, Qırım yollarınıñ yekâne qurucısınıñ saylanmasına biraz daa optimistik baqa.
"VAD" şirketiniñ qıtada (qomşu Rusiyede - QA) büyük ihtisaslı itibarı bar, bunı biz Qırımda "Tavrida" qurulışında da kördik. Qırımlılar, mahsus yol qurulışını baqmaq içün kele edi, çünki işlerniñ tezligi ve koordinatsiyasına şaşa edi. Şübesiz, şirket idaresi pek küçlüdir. Tış hızmetçilernen problemalarımız oldı, amma umumen alğanda işlerniñ keyfiyeti ve süratından memnünim. İşhane ileride de Qırımda çalışacağını tahmin etmek mümkün, çünki o, Qırım kerçeklerini endi añlay ve olarnen çalışmağa bile. Onıñ içün, bu şirket yekâne icracı olacağına qarşı itiraz etip olamayım, ve Qırım yol şirketleri "VAD"dan örnek alacaqlarına ümüt etem", - paylaştı öz fikrinen bloger.
Malümatname: "Tavrida" trassası qurulıp bitken soñ, Qırımnıñ rusiyeli memurlarına köre, o, künde 40 biñ maşna qabul etip olacaq. 2019 senesi avgust ayında AO "VAD" şirketiniñ baş müdiri Valeriy Abramov, "Tavrida" trassası 2020 senesi dekabrde teslim olunacaq, dep Rusiye prezidenti Vladimir Putinni işandırdı.
