Keriç köpründen ilk poyezd dekabr 8-inde keçecek, bilet satıluvı sentâbrde açılacaq. Bu aqta “Qırım demir yolu” şirketiniñ başlığı Vladimir Rezniçenko bildire dep haber etti TASS.
“Kün belgilendi. Ve dekabr 8-unde Qırımğa ilk poyezd keleceginde şübe yoq. Adet üzre, biletler 45 kün evel satılıp başlay, amma bu poyezd biletlerini 90 kün evel satlıqqa çıqarılsın dep añlaştıq”, - Rezniçenkonıñ sözlerinden yaza matbuat.
O qoştı ki, uzaqqa qatnağan poyezdlerge bilet 22 noqtada yapıla: bütün esas vokzal ve avtobus stantsiyalarında, bundan ğayrı Sudaq ve Yalta şeerlerinde.
Yolcu taşuvınen ayrı şirket oğraşacaq, onı fevral ya da martta tayinlecekler. Rezniçenko, bu qomşu Rusiye şirketi olacağını qayd etti.
Onıñ aytqanına köre, köpürniñ demiryol qısmından Aqmescit, Aqyar, Kezlev ve Kefe şeerlerine poyezd qatnaycaq, olarnıñ çoqusı Moskova, Sankt-Peterburg, Yekaterinburg ve Kislovodsk şeerlerinden.
Putinniñ aytqanına köre, Keriç köpründen demiryol areketiniñ açılması Qırım ve Aqyarnı inkişaf etmege büyük imkânlar berir, dep haber ete Azatlıq Radiosı.
Daa evel Keriç köprüniñ demiryol qısmınıñ ayaqları qurulıp bitirilgenleri bildirilgen edi.
Keriç boğazındaki köpürniñ maşna qısmı mayısnıñ 16-nda yengil maşnalarğa açılğan edi. Oktâbr 1-inde yük naqlitatı yürüşi açıldı. Köpürniñ demiryol qısmı soñuna qadar daa qurulmadı.
Ukraina prezidenti Petro Poroşenko, Rusiye işğal etken Qırımda Keriç köprüniñ qanunsız qurucılığı Kreml tarafından halqara uquq bozulğanınıñ daa bir delili ola, dep aytqan edi.
Avropa Birligi ve AQŞ Rusiye ve işğal altındaki Qırım arasında Keriç köprüniñ qısmen açılışını tenqit ettiler. Ukraina tarafı, 2014 senesi Qırım işğalinden soñ Rusiye ile köpür qurucılığana dair añlaşmadan çıqqan edi.
