Keriç boğazı üstünden qurulğan köpürniñ avtoyol qısmı yengil maşinalarnıñ yürüşi içün açıldı.
Rusiye haber agentlikleriniñ bildirgenlerine köre, Rusiyeniñ Krasnodar diyarı tarafından birinci avtomobiller saba saat 5:30-ta köpürden keçtiler.
Bunıñ arfesinde qurulayatqan Keriç köprüniñ avtoyol qısmınıñ açılışında Rusiye prezidenti Vladirmir Putin iştirak etti.
Mayıs 15-te Ukraina prezidenti Petro Poroşenko, Rusiye tarafından ilhaq etilgen Qırımda Keriç köprüniñ qanunsız qurulması Kremlniñ halqara uquqqa itibar etmegeniniñ nevbetteki şaatlığıdır, dedi.
Avropa Birligi Rusiye territoriyası ile ilhaq etilgen Qırım arasında Keriç köprüniñ qısmen açılmasını sert bir şekilde tenqit etti.
Rusiye ukümeti qurulmaqta olğan Keriç köpründe naqliyat havfsızlığınıñ temin etilmesi ile bağlı işlerniñ yapılması boyunca devlet kontraktınıñ müddetini 2019 senesi dekabr 1-ge qadar uzattı.
Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpürni 2018 senesine qadar qurmağa ve 2019 senesiniñ yazında işletüv içün açmağa vade ettiler.
Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.
