Qurucılar, Keriç köprüniñ demiryol qısmınıñ ayaqlarını qurıp bitirdi. Bu aqta noyabr 12-sinde “Qırım köprü” rusiye haber merkezi bildire.
“Bu sadece demiryol içün köpür ayaqları qurulışınıñ bitirilüvi degil. Bu demek ki, “Qırım köprü”niñ bütün ayaqları azır - em avtomobil yolu, em demir yolu. Bu ayaqlar içün biñlerce qazıqlar büyük terenlikke daldırılğan: kimer yerlerde terenlik 100 metrden çoq”, - dep “Stroygazmontaj” rusiye şirketiniñ müdirler şurasınıñ reisi Arkadiy Rotenbergniñ sözlerinden yaza haber merkezi.
Haber merkezinde qoştılar ki, Keriç boğazında farvater ve Qırım yalısı arasında №254 ayaq soñki qurulğan edi.
O farqlı köşelerde 70 metrge daldırılğan 16 borulı qazıqta tökülgen temelden ibaret.
“Ayaq, leyha seviyesine qadar köterildi - bu deñiz seviyesinden 33 metr, yani qararnen 12 qatlı binanıñ öksekligi. Soñki basamaq, onıñ yuqarı qısımlarınıñ - ileride tayançlar qoyulacaq yeriniñ - betonlaması edi.Olarnıñ üstüne köpür közleri qoyulacaq”, - Keriç köprüniñ qurulış leyhasınıñ başı Aleksey Dvoyeglazovnıñ sözlerinden yaza haber merkezi.
Avropa Birligi (AB) Keriç köprüniñ qurulışında iştirak etken rusiyeniñ altı şirketine qarsı sanktsiyalar kirsetti. Bu qarar AB-niñ resmiy jurnalında derc etildi. Olarnıñ arasında rusiyeli iş adamı Arkadiy Rotenbergniñ eki şirketi: PAO “Mostotrest” ve OOO “Stroygazmontaj” bar. Daa evel bu şirketlerniñ ekisi de amerikan sanktsiya cedveline kirsetilgen edi. AB-niñ cedveline AO "İnstitut Giprostroymost – Sankt-Peterburg", AO "Sudostroitelnıy zavod "Zaliv", OOO "Stroygazmontaj – Most" ve Vologda şeeriniñ AO "VAD" de bar.
Oktâbrniñ 4-nde yapılarnıñ qurğulanuvı vaqtında Keriç köprü demiryol qısmınıñ közü suvğa tüşti.
Keriç boğazındaki köpürniñ maşna qısmı mayısnıñ 16-nda yengil maşnalarğa açılğan edi. Oktâbr 1-inde yük naqlitatı yürüşi açıldı. Köpürniñ demiryol qısmı soñuna qadar daa qurulmadı.
«Qırım demiryolunıñ» rus müdiri Aleksey Gladilin, Keriç köprüniñ demiryol qısmı açılğan soñ andan qomşu Rusiyeniñ 11 şeerinden yolcu trenleri keçecegini ilân etken edi.
Ukraina prezidenti Petro Poroşenko, Rusiye işğal etken Qırımda Keriç köprüniñ qanunsız qurucılığı Kreml tarafından halqara uquq bozulğanınıñ daa bir delili ola, dep aytqan edi.
Avropa Birligi ve AQŞ Rusiye ve işğal altındaki Qırım arasında Keriç köprüniñ qısmen açılışını tenqit ettiler. Ukraina tarafı, 2014 senesi Qırım işğalinden soñ Rusiye ile köpür qurucılığana dair añlaşmadan çıqqan edi.
