Kefe sakinleri "aqçanıñ bitip turğanına" şeer başı Sergey Bovtunenkoğa şikâyet ete. Bunı o Facebook saifesinde haber etti.
"Men bu vaziyetni añlayım. Ebet, bugün er kesniñ ağır vaqıtta qullanılacaq ayırılğan parası yoq. Er bir alnı ayrı-ayrı baqacaqmız ve kerçekten ihtiyacı olğanlarğa yardım etecekmiz", - yazdı o.
Bovtunenkonıñ malümatına köre, Kefede volontörlar faal çalışa - ağır alğa tüşken sakinlerge "mebuslar, iş adamları ve sadece göñülliler yardım ete".
"Yardım türlü ola - tükân ve hastahanege barıp kelmek, çöplük çıqarmaq, kommunal hızmetler içün tölemek. Bundan ğayrı, parasız qalgan sakinlerge aş ve ilâclarnen yardım eteler", - yazdı o.
Aprelniñ 15-nde 2182 insan tibbiy közetüv altında edi.
Aprelniñ 16-nda saba Qırımnıñ Aqmescit ve Aqşeyh rayonlarında üç yañı koronavirus hastası qayd etildi. Aqyarda sekiz koronavirus hastası qayd etildi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
