KEFE – Er yerde müsbet bir şey qıdırmaq kerek: Qırımğa turistler keldimi – musafirhane saipleri ve hadimleri bir şey qazandı. Kelmedimi – daa yahşı: tabiat turistlerden temizlendi! Qırım yarımadasında tabiat vaziyeti eyileşti: er alda pozitiv qıdırıñız!
Qırımda ucuzlaşqan mal-mulk aqqında kene aytalar. Ne içün eken? Uçucısızlar sebebinden istegenler eksilgen eken. Buña pek inanmayım. Daa çoq keyflerge bağlıdır: qaçmaq kerek!
Satılğan eski binalarnı da soramay ekenler, olarnı kimse istemey bile. Para masraf et, tamir et – ve yaşama. Böyle para bermege istegenlerniñ nevbeti olmadı.
Daa benzin meselesi çıqtı. Ya ne oldı, ne içün?
Tek Aqyarda da degil. Aqmescitte de Qırımda benzin problemleri bar, dep yazalar.
Akimiyet ise inkâr ete: benzin bar! İnanamızmı? Aydı, yahşı, şimdilik inanamız.
Mında keriçliler meraqlı şey yaptı. Anda evler üstünde ateş açılğanda yapılacaqlarnen talimatlar peyda olıp başladı. Talimat uzun, mevzusı – telâşlı cemidan azırlanması. Ananeviy cedvel bar: vesiqa, ilâc, çorap, trusik, sviter, fenerçik.
Metin yahşı, tesir etti. Biriniñ böyle çantası daa azır olmasa, cedvelge baqmaq kerek. Amma böyle bir şey oqumaq da, doğrusını aytqanda, kerginlik doğura. Söz sırası, qaçacaq yerler (bu bomba sığınaqları), ne yazıq ki, yoq.
İçtimaiy ağlar da qoşuldı. Qırımda uçucısızlar tüşürilgeninen bağlı haberler sahte ola bile eken. Em de Qırım akimiyetinden kele.
Er vaqıt kibi, seferber etilgenlerge yardım aqqında: veteranlar da qoşuldı, qaynaq cihazına para bergen ekenler.
Qırım reberligi sakinlerni bu yıl er üçünci künü raatlıq olacaq, dep quvandıra. Bayramlar bitmey, çalışacaq vaqıt yoq. Ya kerekmi?
Bunı begendim: Qırımğa Avropadan kamuflâj urba ketirile eken.
Kirip baqsam, bar eken. Nasıl oldı? Anda cenk aqqında bir şeyler yazğanlar, Rusiye o tarafta degil sanki. O tarafta eken – kamuflâjlıq çerçivesinde.
Yerli akimiyet de er şeyniñ rusça olması müim, dep açuvlanıp başlağan. Rica etem! Bu tam da rus üslübi.
Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.