Qırım.Aqiqat mühbiri Taras İbragimovnıñ işğal etilgen Qırımğa ve Rusiyege kirişiniñ 34 yılğa yasaqlanmasınıñ sebebi qanunsız iş faaliyeti içün memuriy protokol oldı.
Jurnalistniñ aytqanına köre, 2019 senesi mayısnıñ 18-nde Rusiyeniñ ekstremizm ile küreş merkeziniñ hadimleri onı kamerağa çıqardı. Mühbir ise Aqmescitte qırımtatar sürgünliginiñ qurbanlarını añma kününde matem mitingini Qırım.Aqiqat içün canlı yayınlağan edi.
Daa soñra, mayısnıñ 30-nda, OMON hadimleri onı Aqmescitte Rusiye kontrolindeki Kiyev rayon mahkemesi ögünde tuttı, andan Qırımdaki Rusiye İç işler nazirliginiñ migratsiya meseleleri idaresine alıp ketip, Rusiye memuriy cinayetler kodeksiniñ 18.10 maddesi esasında eki biñ rublege cezaladı, dep qayd etti İbragimov.
«Köç hızmetiniñ hadimleri qanunsız emek faaliyetim aqqında ariza kelgenini aytıp, «E» Merkeziniñ hadimi çıqarğan operativ videonı kösterdiler. Videoda cep telefonımnı tutıp, Nariman Celâldan matem mitinginen bağlı izaat alğan edi. Federal köç hızmetiniñ hadimleri maña qarşı protokol tizip, eki biñ rublege cezaladılar ve (Rusiye – QA) Tış işler nazirliginde qayd olmağa tevsiye ettiler», – dep tarif etti jurnalist.
İbragimovnıñ aytqanına köre, bir-eki künden soñ o, para cezasını töledi ve daa bir ay devamında Qırımda çalıştı. 2020 senesi yanvarniñ 19-nda daa bir iş ziyareti vaqtında Qırımnıñ memuriy sıñırında Rusiye FSBsiniñ sıñır hızmeti hadimi jurnalistke Rusiyege ve işğali altındaki Qırımğa kirişi 2054 senesi mayısnıñ 30-na qadar yasaqlanğanına dair habername berdi.
«Bu habernamede olğan 2054 senesi mayısnıñ 30-ı kiriş yasağımnıñ sebebi 2019 senesi mayısnıñ 30-nda açılğan memuriy dava ve berilgen para cezası olğanını isbatlay», – dep añlattı jurnalist.
Rusiye FSBsiniñ sıñır hızmeti hadimleri İbragimovnıñ aytqanlarını şimdilik izaatlamay.
2019 senesi fevralniñ 18-nde Qırım.Aqiqatnen işbirligi yapqan fotoressam Alina Smutkonıñ Rusiye işğal etken Qırımğa kirişi 2028 senesine qadar yasaqlandı. Smutko, yasaqnıñ sebebi onıñ zenaat işi oldı, dep bildirdi. Alina Smutkonıñ fotoresimi Radio Free Europe/Radio Liberty Culture & Traditions umumşirket fotoresimler yarışınıñ üç ğalebe işinden biri oldı.
2018 senesi noyabr ayında Rusiye FSBsi Qırım.Aqiqatnen çalışqan ukrainalı jurnalist Alena Savçuknıñ Qırımğa ve qomşu Rusiyege kirişini 2028 senesine qadaryasaqladı. Onıñ aytqanına köre, kirişi Rusiyege kiriş ve çıqış tertibine dair Federal qanunnıñ 27-nci maddesiniñ 1-inci qısmına köre («Devletniñ mudafaası ya da telükesizligi, ya da cemaat nizamı, ya da eali sağlığını qorumaq maqsadınen») yasaq etildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
