Ukrainalı jurnalist Alöna Savçuknıñ Qırım.Aqiqatqa bildirgenine köre, onıñ Rusiyege ve işğali altındaki Qırımğa kirişi Rusiyege kiriş ve çıqış tertibine dair Federal qanunnıñ 27-nci maddesiniñ 1-inci qısmına köre («Devletniñ mudafaası ya da telükesizligi, ya da cemaat nizamı, ya da eali sağlığını qorumaq maqsadınen») yasaq etildi.
«Kiriş yasağınıñ sebepleri aydınlatılğan qısım videoğa çıqarıldı. Tahminen 40 daqqa tutıp, parmaq izlerimni alğanlar», – dedi Savçuk.
Daa evel haber etilgeni kibi, Rusiye FSBsi ukrainalı jurnalistniñ Qırımğa ve qomşu Rusiyege kirişini 2028 senesine qadar yasaq etti. Adise esas Ukraina ve işğal altındaki yarımada arasındaki memuriy sıñırda – «Canköy» keçiş noqtasında yüz berdi.
Halqara aq qorçalayıcı teşkilâtlar ve Ğarp memleketleri, Qırımda Rusiye akimiyeti jurnalistlerniñ faaliyetine mania olğanını bir çoq kere qayd etken edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
