Rusiyeniñ Federal telükesizlik hızmeti ukrainalı jurnalist Alöna Savçuknıñ işğal etilgen Qırımğa kirişini yasaqladı. Bunı o, Facebookta yazdı.
Adise «Canköy» keçiş noqtasında oldı.
«Qırımğa ve Rusiyege 10 yıl devamında – 2028 senesiniñ avgust ayına qadar kirmek yasaq. FSB, öz devletiniñ mudafaasını ve telükesizligini menden qoruy. Pek yazıq, ebet», – dep yazdı jurnalist.
Qırım.Aqiqat tafsilâtlı malümat almağa tırışa.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
