İsrailniñ Tış işler nazirligi BM baş kâtibi António Guterresni istenmegen kişi ilân etip, memleketke kirişini yasaqladı. Bu aqta X içtimaiy ağında müessise yolbaşçısı İsrael Kats bildirdi.
«Dünyanıñ aman-aman er bir memleketi yapqanı kibi, İrannıñ İsrailge qarşı deşetli ücümini takbih etip olamağanlar İsrail toprağına ayaq basmağa lâyıq degil», – dep yazdı o.
Onıñ aytqanına köre, BM baş kâtibi 2023 senesi oktâbrniñ 7-nde «Hamas» (ABD ve AB terror teşkilâtı olaraq tanığan) tarafından İsrailge yapılğan ücümni alâ daa qabaatlamadı ve teşkilâtnı terrorist dep ilân etmek içün bir adım atmadı.
«İsrail öz vatandaşlarını ve milliy itibarını qorçalamağa devam etecek, António Guterres olsa da, olmasa da», – dedi İsrailniñ Tış işler naziri.
Oktâbrniñ 1-nde İsrail İrandan büyük raketalar darbesine oğradı. The Jerusalem Post malümatına köre, İsrailge 200-ge yaqın raketa atıldı. İsrailniñ ordusı bildirgenine köre, olarnıñ çoqusı atılğan, amma bazı raketalar açıq yerlerde tüşken. Bir ölüm belli, filistinli işçi elâk oldı.
Sentâbrniñ 30-nda aqşam İsrail Lübnannıñ cenübinde «Hizbullahnıñ» obyektleri ve infrastrukturasına qarşı «sıñırlı qara basqınlar» başlatqan soñ İran ücüm etip başladı. ABD «Hizbullahnı» terror teşkilâtı olaraq tasnif ete, AB ise onıñ silâlı qanatını qara cedvelge kirsetti, amma siyasiy firqasını degil. Lübnan parlamentinde «Hizbullah» firqasınıñ yerleri bar.
İsrailniñ baş naziri Binyamin Netanyahu bu ücümniñ muvafaqiyetsiz olğanını bildirdi. «İsrailniñ ava mudafaası sayesinde buña mania oldı. İran bugün büyük bir yañlış yaptı ve cezasını çekecek. İran rejimi bizim öz-özümizni qorçalamaq qararımıznı ve duşmanlarımızğa qarşı cevap bermek qararımıznı añlamay», – dedi Netanyahu ve İsrail tek bir qaidege riayet etecek, dep qoştı: «bizge kim ücüm etse etsin, biz oña ücüm etecekmiz».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
