Salavatnıñ (Başkortostan Cumhuriyeti) №2 Rusiye koloniyasında yatqan Yaltadaki «Hizb ut-Tahrir davasınıñ» mabüsi İnver Bekirov mikroinsult keçirdi, dep bildire «Qırım birdemligi» cemaat birleşmesi advokat Rustem Kâmilevniñ malümatına esaslanıp.
Bekirovnıñ aytqanına köre, advokat koloniyağa kelmezden bir afta ögüne alı yaramay edi, soñra ise «afızasını coydı». Feldşerlerniñ bildirgenine köre, tibbiy bölükke özü kelip yardım soradı.
«Sallana edim ve qan basımı arttı, bir müddet koordinatsiyamnı coydım», – dep bildirdi Bekirov.
Özüne kelgende Bekirov qayda olğanını ve ne olğanını sorap başladı. Bekirovnıñ mikroinsultı olğanı añlaşıldı, dep bildirdi «Qırım birdemligi».
Advokat Rustem Kâmilevniñ aytqanına köre, tibbiy bölük Bekirovnıñ er angi yüküni yasaqladı, lâkin koloniya memuriyeti eñ yaqın vaqıtta «tutuv nizamını ciddiy sayılmağan seviyede bozğanı içün onı ceza izolâtorına avuştıruv meselesini baqmağa» niyetlene.
Al-azırda Rusiyeniñ Cezalarnı yerine ketirüv federal hızmeti ya da Salavattaki №2 Rusiye koloniyası mabüs İnver Bekirovnıñ alı aqqında bir malümat bermey.
Ukraina Yuqarı Radasınıñ insan aqları vekâletlisi Lüdmila Denisovanıñ Facebook saifesinde bildirgenine köre, koloniya memuriyetiniñ yapqanları BM İqtisadiy ve İçtimaiy Şura tasdıqlağan Mabüslerge standart yanaşuv qaideleriniñ 22-nci maddesini ve Dünya sağlıq teşkilâtı ve BM işkencelerge yol bermememe alt komitetiniñ tevsiyelerini boza.
Ukraina ombudsmanı Rusiye İnsan aqları vekâletlisi Tatyana Moskalkovağa muracaat etip, İnver Bekirovnıñ aqlarını ğayrıdan tiklemege ve oña kerekli tibbiy yardım köstermege talap etti. Denisova Başkortostan Cumhuriyetiniñ baş prokurorı Vladimir Vedernikovdan №2 koloniya memuriyetiniñ areketlerine qıymet kesmesini talap etti.
Hatırlatamız, Rostov-na-Donu Cenübiy okrugı arbiy mahkemesiniñ qararınen Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Memorial» Rusiye aq qorçalayıcı merkezi beş qırımlını siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
