COVID-19 pandemiyasından sebep belli qırımlılarnıñ çoqusı evde qalmalı: çekişler toqtatıldı, kontsertler lâğu etildi, yarışlarnıñ tarihı deñiştirildi. Biz olarnıñ içtimaiy ağlarından eñ meraqlısını topladıq.
Aqmescitte doğğan ukrain gimnastkası Anna Rizatdinova İnstagramda fleşmobnı başladı. Oña köre, Anna saifesinde derc etken videodaki gimnastika üç kün devamında balalarnen beraber yapılmalı ve adamlarnıñ öz saifesinde kösterilmeli.
Bundan ğayı Anna online rejiminde gimnastkalarnı idman ettire. Altı kün evel o zenaatdaşlarınıñ bir saatlıq temrinini yerleştirdi. Rizatdinavanıñ aytqanına köre, onda çeşit-türlü memleketlerden biñden ziyade gimnastka iştirak etti.
Aktör ve rejissör Ahtem Seitablayev içtimaiy ağlarda abunecilerine ve dostlarına muracaar etip, izolâtsiya rejimine uymalarını istey. "Dostlar, özüñizni ve yaqınlarıñıznı telüke satına atmaqnı qaldırıñ, neticede bu koronavirusnı nokaut etmek içün bizge küç kerek", - dedi o Facebookta derc etilgen video muracaatında.
Seytablayevniñ zenaatdaşı, qırımlı Ukraina rejissörı Nariman Aliyev karantinde ev eşyasını qullanıp evde komik mini filmlerni yapa.
Bundan ğayrı muzıkalı video yazıp, içtimaiy ağlarında derc ete.
Qırım Muhtar Cumhuriyetinde nam qazanğan yırcı Zlata Ogneviç İnstagramda online oturışmaları teşkil ete ve anda abunecileri içün yırlay.
Yırcı Camala ise martnıñ 24-ünde türkülerinden bazılarını yırlap, bir saatlıq online kontsertni keçirdi.
Ve daa o eñ begengen türkülerini başqadan yırlap (cover yapıp), videolarını içtimaiy ağlarında derc ete.
Yaqın vaqıtta dağılğan "Vremâ i steklo" muzıka taqımınıñ iştirakçisi, Aqmescitten doğğan Nadâ Dorofeyeva karantin vaqtında evdeki idmanlarnıñ videolarını yaza. Ve sabıq taqımdaşı Aleksey Zavgorodniy ile "Navsegda" türküsiniñ akustik versiyasını repetitsiya ete.
Alıp barıcı, qırımlı Maşa Yefrosinina qadınlar evde karantinni nasıl keçirgeni aqqında külünçli videolarnı çıqara.
Aqyarda doğğan ukrain model Anna Kostromiçeva da ondan artta qalmay. Öz İnstagram saifesinde o çöplık çıqarmaq içün nasıl azırlanğanı aqqında videonı yerleştirdi. Alla, yuqarıda añılğan bütün sanatçılar kibi, abunecilerine özlerini izolâtsiya etmekni ve evde qalmaqnı rica ete.
