«Hizb ut-Tahrir davalarınıñ» mabüsleri Rostov-na-Donu mahkemesinde apiske alınğan advokat Edem Semedlâyevge qoltutuv yazuvlı şiarlarını köterdi. Bu aqta «Qırım birdemligi» cemaat birleşmesi haber etti.
«Emil Ziyadinov, Timur Yalkabov, Lenur Seydametov, Osman Arifmemetov, Enver Ametov, Ruslan Suleymanov, Rustem Şeyhaliyev ve Yaşar Muyedinov Cenübiy okrugınıñ arbiy mahkemesinde Qırımda 12 künge apiske alınğan imayeci Edem Semedlâyevge qoltutuv sözlerinen yazuvlı şiarlarnı azırlap köterdi. Mahkeme vekilleri kütleviy haber vastalarınıñ vekilini memuriy protokolnen qorquzıp, video çıqarmasına mania oldı», – dep aytıla haberde.
«Grani.ru» Rusiye neşiriniñ mühbiri Marlen Kadırovnıñ tarif etkenine köre, Yalkabov ve Seydametovnıñ yazuvlı şiarlarında qırımtatarca «Halq imayecisi. Onı azat etiñiz» ve inglizce «Edem Semedlâyevge azatlıq» dep yazılğan edi. Mahkeme vekilleri buña qulaq asmadı.
«Emil Ziyadinovnıñ davası baqılğan diñlevlerde «akvariumdaki» er adamı advokat Edem Semedlâyevge qoltutuv yazuvlı şiarını köterdi, «Grani.ru» jurnalisti Edem İbragimov ise fotokamerağa çıqardı. Faqat mahkeme vekilleri foto çıqarılmasını toqtatsın, dep talap etti. Hızmet temsilcileriniñ aytqanına köre, yazuvlı şiarlarnı çıqarmağa yasaq, aks alda memuriy protokol tizilecek, dep ayttı. Mahkemede olğan imayeci Ayder Azamatov mahkeme vekiline jurnalistniñ yazuvlı şiarlarnen alâqası yoq, vaziyetke bir şekilde tesir etecek olsa, Emil Ziyadinovğa qarşı tedbir almalı, dep ayttı», – dep bildirdi birleşme.
Advokatnıñ sözlerine kâtip «mahkeme vekili yasaq ete», dep qayd etti. Şunıñ içün jurnalist tek bir yazuvlı şiarnıñ fotoresimini yapıp oldı.
Noyabrniñ 11-nde Rusiye kontrolindeki Aqmescitniñ Merkeziy rayon mahkemesi Edem Semedlâyevni Ekstremizm ile küreş merkeziniñ bölük başı Ruslan Şambazovnıñ ses qaydını toqtatmaq talabını yerine ketirmegeni içün 12 künge apiske aldı. Mahkeme oña Ekstremizm ile küreş merkezi hadiminiñ soyunmaq talabını yerine ketirmegeninen bağlı ekinci memuriy dava boyunca 4 biñ ruble para cezasını da berdi.
Qırım Muhtar Cumhuriyeti ve Aqyar prokuraturası qırımlı advokat Edem Semedlâyevni apiske alğan Aqmescitteki Rusiye mahkemesiniñ qararına uquq ceetinden qıymet kesmege vade ete.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Semedlâyev, oktâbrniñ 25-nde Aqmescitteki polis bölügi ögünde tutulğan soñ Rusiye quvetçileriniñ yapqanlarını Qırımnıñ Advokat palatasına şikâyet etti, dep bildirdi.
ABD, Rusiyeni qırımlı advokat Semedlâyevni acele azat etmesine çağırdı.
