Qırımda apiske alınğan advokat Edem Semedlâyevge qoltutuv fleşmobı raatlıq künlerinden berli devam ete.
Bu aqta «Qırım birdemligi» cemaat birleşmesi Qırım.Aqiqatqa bildirdi.
Yarımadanıñ farqlı rayon sakinleri Semedlâyevniñ fotosüretinen ve onı azat etmek çağıruvınen foto çıqarıp, içtimaiy ağlarda paylaşa.
Noyabrniñ 11-nde Rusiye kontrolindeki Aqmescitniñ Merkeziy rayon mahkemesi Edem Semedlâyevni Ekstremizm ile küreş merkeziniñ bölük başı Ruslan Şambazovnıñ ses qaydını toqtatmaq talabını yerine ketirmegeni içün 12 künge apiske aldı. Mahkeme oña Ekstremizm ile küreş merkezi hadiminiñ soyunmaq talabını yerine ketirmegeninen bağlı ekinci memuriy dava boyunca 4 biñ ruble para cezasını da berdi.
Qırım Muhtar Cumhuriyeti ve Aqyar prokuraturası qırımlı advokat Edem Semedlâyevni apiske alğan Aqmescitteki Rusiye mahkemesiniñ qararına uquq ceetinden qıymet kesmege vade ete.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Semedlâyev, oktâbrniñ 25-nde Aqmescitteki polis bölügi ögünde tutulğan soñ Rusiye quvetçileriniñ yapqanlarını Qırımnıñ Advokat palatasına şikâyet etti, dep bildirdi.
ABD, Rusiyeni qırımlı advokat Semedlâyevni acele azat etmesine çağırdı.
