Rusiyeniñ Rostov-na-Donu şeerindeki Cenübiy okrugınıñ arbiy mahkemesi dekabrniñ 1-nde Aqmescitteki ekinci «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov, Bilâl Adilovnıñ apis müddetini 3 ayğa uzattı.
Qabaatlav tarafı, dava mabüsleri «memleketni terk ete, gizli şaatlarnıñ ve umumen devletniñ telükesizligi içün telükeli ola bile», dep qayd etti.
«Bundan ğayrı, ekinci Aqmescit gruppası davasınıñ madde ağırlığı apis müddetini uzatmaq içün sebep ola. Şu sebepten devlet qabaatlayıcısı apiste tutuv müddetini 3 ayğa – 2022 senesi martnıñ 19-na qadar uzatmağa rica etti», – dep bildirdi «Qırım birdemligi» cemaat birleşmesi.
Advokat Emil Kurbedinov sıñırlav tedbiriniñ uzatıluvına qarşı çıqqan edi. «Ev apsi de azatlıq degil, amma bu sıñırlav müddeti mabüslerge balalarnı terbiye etmege ve sağlığını tüzetmege imkân berir», – dep qayd etti o.
Kurbedinov, şimdiki tutuv şaraitleri dava mabüsleriniñ sağlığına pek tesir etti, dep qayd etti. Tofik Abdulgaziyev izolâtorda olğanda qandalay çaqqanı içün qan zeerlenüvini keçirdi.
Tayinlengen advokatlar imayecilerniñ itirazlarına qoltuttı. Faqat mahkeme dava mabüsleriniñ apiste qaluv müddetini 2022 senesi martnıñ 19-na qadar uzattı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
