Mabüsler ve SİZOda bulunğanlar tedaviylengen №19 Rostov vilâyetlerara verem hastahanesiniñ (RVVH) ekimleri pnevmoniyağa oğrağan Qırımdaki «Hizb ut-Tahrir davasınıñ» 64 yaşında Zekirya Muratovnıñ alını «orta ağır» saya.
Bu aqta advokat Emine Avamileva ve Muratovnıñ qızı Lenara №19 RVVH hastahanesiniñ tibbiy bölük yolbaşçısına esaslanıp «Qırım birdemligine» ayttılar.
Lenaranıñ aytqanına köre, ekim Muratovda koronavirus qayd etilmedi, dep bildirdi. O, aqcigerlerniñ alçaq saturatsiyasınen intensiv tedaviy bölüginde yata: bölükke onı 80%-nen ketirgenler, şimdi saturatsiyası 90% ola. Muratovnıñ sıcağı tüşti.
Tibbiy bölük yolbaşçısı qayd etkenine köre, «tedaviylevge köre hastanıñ alı müsbet deñişe». Onıñ aytqanına köre, Zekirya oda içinde yüre, oksigen kontsentratornen nefes ala ve planğa köre tedaviylene. Ekimniñ aytqanına köre, bu alda aqcigerlerniñ saturatsiyası alçaq olsa da, Muratovnıñ reanimatsiyağa ve qoşma ilâclarğa ihtiyacı yoq.
Bundan evel haber etilgenine köre, Muratov pnevmoniya şübhesinen Cezalarnı yerine ketirüv federal hızmetiniñ müessise hastahanesinde buluna.
Ukraina Yuqarı Radasınıñ insan aqları vekâletlisi Lüdmila Denisova Rusiye akimiyetinden qırımlınıñ tibbiy hızmetlerge irişimini temin etmege talap etti.
İyünniñ 8-nde Vlasiha (Rusiye) İstinaf mahkemesi Zekirya Muratovnıñsıñırlav tedbirini deñiştirmedi.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi aprelniñ 21-nde Bağçasaraydaki «Hizb ut-Tahrir davasınıñ» mabüsi Zekirya Muratovnıñ sıñırlav tedbirini üç ayğa – avgustnıñ 17-ne qadar uzattı.
2020 senesi dekabr ayında Zekirya Muratovnıñ Qırımdan Rusiyege etap etilgeni belli oldı. Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
