Link açıqlığı

Saatnıñ esas haberi

Rusiyedeki mahkeme Bağçasaraydaki «Hizb ut-Tahrir davasınıñ» mabüsini apiste qaldırdı – advokat


Zekirya Muratov
Zekirya Muratov

Vlasiha şeeriniñ Rusiye istinaf mahkemesi Bağçasaraydaki «Hizb ut-Tahrir davasınıñ» mabüsi olğan qırımtatarı Zekirya Muratovnıñ sıñırlav tedbirini deñiştirmedi. Bu aqta «Qırım birdemligi» advokat Lilâ Gemeciniñ malümatına esaslanıp bildire.

«İmaye Muratovnıñ ağır hastalıqları ve apisnen bağlı olmağan sıñırlav tedbiriniñ berilmesi içün sebep olğan saqatlığı bar dep, apis cezasını uzatmaq imkânsız ola, dep israr etti. Müvekkilniñ Ukraina vatandaşı olğanına baqmadan, Qırım ve Rusiyeni terk etmege imkânı yoq. Şaatlağa basqı yapıp olamay, deliller toplandı ve cinaiy davağa ilâve etildi – yani mahkeme tahqiqatınıñ ketişatına tesir etip olamaz. Prokuror, Muratovnı SİZOda tutuv müddeti uzatılğan Cenübiy okrugınıñ arbiy mahkemesiniñ qararını deñiştirmemege rica etti», – dep tarif etti faallerge Lilâ Gemeci.

«Qırım birdemligi» bildirgenine köre, imayeniñ şikâyeti qanaatlendirilmedi, mahkeme qararnıñ netice qısmını seslendirdi. Advokatlar red cevabınıñ sebebini bir qaç künden soñ, qararnıñ bütün metnini alğanda bilecekler.

Rusiyeniñ Rostov-na-Donu şeerindeki Cenübiy okrugınıñ arbiy mahkemesi aprelniñ 21-nde Bağçasaraydaki «Hizb ut-Tahrir davasınıñ» mabüsi Zekirya Muratovnıñ sıñırlav tedbirini üç ayğa – avgustnıñ 17-ne qadar uzattı.

2020 senesi dekabr ayında Zekirya Muratovnıñ Qırımdan Rusiyege etap etilgeni belli oldı. Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.

Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG