Rusiyeniñ Cezalarnı yerine ketirüv federal hızmeti Rusiyeniñ Rostov-na-Donu SİZOsında mikroinsult keçirgen Aqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyetine dair tafsilâtlı malümat bermeycek.
Bu aqta «Qırım birdemligi» cemaat birleşesi «İnsan aqları» gazetasınıñ baş muarriri Lev Ponomarevniñ malümatına esaslanıp bildire. Ponomarev Cezalarnı yerine ketirüv federal hızmetinden Servet Gaziyevniñ sağlıq vaziyetinen bağlı bergen muracaatına resmiy cevap aldı.
CYEKFH cevabında aytılğanına köre, al-azırla «Gaziyevniñ alı bir qarar, acele tibbiy yardımına ve hastahanege alınmasına ihtiyacı yoq», müessise «ekim sırına» esaslanıp, şimdiki vaziyetiniñ tafsilâtlarını bermege razı olmadı.
«Vatandaşnıñ tibbiy yardım almaq içün bergen muracaatı, sağlıq vaziyeti ve diagnozı, tibbiy tedqiqler ve tedaviylev neticesinde alınğan malümat ekim sırı ola ve aydınlatılmay», – dep aytıla cevapta.
Daa evel belli olğanına köre, Aqmescitteki ekinci «Hizb ut-Tahrir davasınıñ» mabüsi 61 yaşında Servet Gaziyev Rostov-na-Donu tahqiqat izolâtorında mikroinsult keçirdi.
Aqmescitte «Hizb ut-Tahrir davasınıñ» mabüsi Servet Gaziyev içün destek aktsiyası ötkerildi. Onlarnen faalniñ yazuvlı şiarlarında «Yaqınlarımıznı apis etmege toqtatıñız, olar iç bir vaqıt terrorcılıqnen oğraşmadılar», «Cezahaneleriñizde qartlarımıznı öldürmege toqtatıñız», «Qartlarnı iskencelerge oğratmağa toqtatıñız», «Semetdeşimizge tibbiy yardım köstermege talap etemiz» dep yazıldı.
Advokat Aleksandr Stasük bildirgenine köre, o, Cezalarnı yerine ketirüv federal hızmetine, Rostov vilâyetiniñ prokuraturasına, insan aqları vekâletlisine ve izolâtornıñ tibbiy bölügine muracaat yazdı. Onıñ qayd etkenine köre, o, Gaziyevge «tibbiy yardım kösterilmemesinen bağlı» teşkerüv keçirmek talabınen Rostov vilâyetindeki Rusiye İç işler nazirliginiñ baş tahqiqat idaresine şikâyet azırlay.
İyülniñ başında Rusiyeniñ Cenübiy okrugınıñ arbiy mahkemesinde Aqmedsjitteki «Hizb ut-Tahrir davasınıñ» oturışuvı mabüslerniñ sağlıq vaziyeti sebebinden başqa künge qaldırıldı. İlk malümatqa köre, Gaziyevniñ ve Erfan Osmanovnıñ COVID-19-ı qayd etildi.
Rostov vilâyeti Rusiye İnsan aqları vekâletlisiniñ apparat reberi Vladimir NekrasovAqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyeti fenalaşqanı içün tibbiy teşkerüv keçirmek talabınen muracaat yolladı. Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovağa muracaat etip, Gaziyevniñ aqlarını ğayrıdan tiklemege, oña kerekli tibbiy yardım köstermege ve sağlıq vaziyeti sebebinden sıñırlav tedbirini deñiştirmege talap etti.
Rostov-na-Donu (Rusiye) mahkemesi yaramağan dava mabüsi Servet Gaziyevniñ sağlıq vaziyeti sebebinden Aqmescitteki ekinci «Hizb ut-Tahrir davasınıñ» oturışuvını başqa künge qaldırğan edi. Oña yatıp raatlanmağa tevsiye etilgen edi.
Mayısnıñ 13-nde Rostov-na-Donu mahkeme oturışuvında Servet Gaziyev yaramağan edi. «Acele yardım» feldşeri bir qaç ağrı kesici ine urdı, amma Gaziyev mahkeme soñuna qadar raatsızlanğan edi. Martnıñ 30-nda Gaziyevniñ aşqazan ağrıları sebebinden de mahkemege «acele yardım» çağırılğan edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetovve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
