Martnıñ 30-nda Rostov-na-Donudaki Cenübiy bölgeniñ arbiy mahkemesinde ekinci Aqmescit «Hizb ut-Tahrir davası» boyunca oturış vaqtında 60 yaşındaki qırımtatar Servet Gaziyev midye ağrısı sebebinden yaramadı, mahkemege acele yardımı çağırdılar, dep haber ete «Qırım birdemligi».
Buña mаhkemeciniñ diqqatını davanıñ diger mabüsi Alim Karimov celp etken. Mahkeme ekimlerni çağırmaq içün teneffüs ilân etken.
Bazarertesi künü, martnıñ 29-nda, Kreml kontrolindeki Qırım Yuqarı mahkemesiniñ tibbiy bölük ve Cezalarnı yerine ketirüv federal hızmetiniñ Qırım temsilciligi Aqmescitteki ekinci «Hizb ut-Tahrir davasınıñ» mabüsi Cemil Gafarovnıñ sağlıq vaziyetine dair malümat bermekni qanunsız red etkeni aqqında qararı işke tüşürildi.
Год в СИЗО: история «второй симферопольской группы Хизб ут-Тахрир» (фотогалерея)
Hatırlatamız, FSB Aqmescitteki «Hizb ut-Tahrir davasınıñ» mabüslerini beş gruppağa böldi.
«Memorial» aq qorçalayıcı merkezi dava mabüslerini siyasiy mabüs dep tanıdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
