Aqmescitteki ekinci «Hizb ut-Tahrir davasınıñ» beş mabüsi Rusiyeden Aqmescitniñ №1 SİZOsına gizli şaat tarafından tanılması içün avuştırıldı. Bu aqta advokat Mammet Mambetov Qırım.Aqiqat mühbirine tarif etti.
İzzet Abdullayev, Seytveli Seytabdiyev, Akim Bekirov, Alim Karimov ve Asan Yanikov eñ azından aftanıñ soñuna qadar tahqiqat izolâtorında qalacaqlar.
«İyülniñ 23-nde mahkeme oturışuvı vaqtında İzzet video bağı vastasınen onı Şahtı SİZOsından Rostov SİZOsına avuştıracaqlar, dep bildirdi. Bir-eki künden soñ davanen oğraşqan FSB tahqiqat gruppasınıñ reberi İzzet ve bu davanıñ daa dört mabüsi Rostov SİZOsından Aqmescit SİZOsına tahqiqat tedbirleriniñ keçirilüvi içün avuştırıldı, dep bildirdi», – dedi Mambetov.
Tahqiqat tedbirlerinde gizli şaat beş qabaatlını tanıdı.
«Bugün (iyülniñ 30-nda – QA) FSB idaresinde gizli şaat müvekkilim ve daa dört qabaatlını tanıdı. Tahqiqat tedbirleri eñ azından aftanıñ soñuna qadar devam etecek. Bu künleri apis müddeti uzatılacaq. Oturışuv Qırımda olacaqtır. Soñra olarnı kene tutulğan SİZOğa qaytaracaqlar», – dep qoştı o.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
