Rusiye kontrolindeki Qırım Yuqarı mahkemesi advokatlarnıñ Aqmescitniñ Kiyev rayon mahkemesiniñ Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılğan Alim Sufyanovnı SİZOda ve Aleksandr Sizikovnı ev apsinde tutmaq qararlarına qarşı bergen istinaf şikâyetlerini red etti.
Bu aqta «Qırım birdemligi» birleşmesi qırımlılarnıñ advokatlarına esaslanıp bildire.
«Ev apsi SİZOda tutuv olmasa da, biz razı degilmiz. Qarar mahkeme tarafından sebepsiz çıqarıldı, müvekkilimniñ qabaatı isbatlanmadı», – dep añlattı Sizikovnıñ advokatı Safiye Şabanova.
Berilgen malümatqa köre, oturışuv vaqtında advokat Sizikovğa berilgen yasaqlarnı yımşatmağa rica etti – evni terk etmemek, internet ağını qullanmamaq, evden ihtiyac olğanda çıqmağa izin bermek: mal, ilâc almaq içün, tibbiy bölükke barıp kelmek içün.
Amma qadı evelki mahkeme qararını deñiştirmedi – Sizikov 2020 senesi sentâbrniñ 2-ne qadar ev apsinde qalacaq. İmayesi bu qararnı tekrar şikâyet etmege niyetlene.
Faallerniñ malümatına köre, Alim Sufyanovnıñ advokatı izaat bermedi, amma tuvğanlarına istinaf şikâyeti qanaatlendirilmedi, dep bildirdi. Er adam sentâbrniñ 2-ne qadar Aqmescit SİZOsında bulunacaq.
İyülniñ 7-nde mahkeme qırımlı musulman, birinci derece körme saqatı Aleksandr Sizikovnı sentâbrniñ 2-ne qadar ev apsine yolladı. Onı «Hizb ut-Tahrir» faaliyetini teşkil etkeninden şübheli sayalar.
İyülniñ 7-nde saba erte qırımlılarnıñ evlerinde tintüvler keçirildi: Emil Ziyadinov, İsmet İbragimov, Alim Sufyanov, Seyran Hayretdinov, Aleksandr Sizikov, Vadim Bektemirov, Zekirya Muratov ve Aluştada Dilâver Memetov. Memetov tintüv vaqtında evde degil edi, onı qıdırmağa devam eteler, dep bildire «Qırım birdemliginiñ» faalleri.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
Ukraina Tış işler nazirligi beyanatını derc etip, «qırımtatarlarnıñ evlerinde keçirilgen yañı qanunsız tintüvler ve tutuvlarnen bağlı narazılığını» bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
