Ukraina prezidentiniñ Qırım Muhtar Cumhuriyetindeki temsilciligi iyülniñ 7-nde Rusiye quvetçileriniñ işğal etilgen Qırımda qırımtatarlarnıñ evlerinde keçirgen kütleviy tintüvlerine cevap berdi. Müessise böyle areketlerni takbih ete, dep bildirdi.
«Ukraina prezidentiniñ Qırım Muhtar Cumhuriyetindeki temsilciligi işğalci idareniñ cemaat fikri olğan Ukraina vatandaşlarını taqip etkenini takbih ete, er bir adiseni qayd ete ve Rusiye Federatsiyasınıñ vaqtınca işğal etilgen Qırım yarımadasında kerçekleştirgen siyasiy sebepli taqipler cedveline malümat qoşa», – dep aytıla müessise haberinde.
Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñevinde. Memetov tintüv vaqtında evde yoq edi, onı qıdırmağa devam eteler.
Tintüv sebepleri belli degil, Qırımnıñ Rusiye quvet müessiseleri vaziyetni izaatlamay.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
