Cumaertesi künü saba saat 7-de Kremlniñ sabıq siyasiy mabüsi Edem Bekirovnıñ Rusiye ordusı tarafından işğal etilgen Herson vilâyetiniñ Novooalekseyevkadaki evinde tintüv keçirildi. Bunı Telegram kanalında Ukrayina ombudsmanı Lüdmila Denisova haber etti.
"Arbiy urbada, maskalı ve silâlı adamlar azbarğa qoradan basıp kirdiler. Odada tek Edemniñ apayı Gülnara Bekirovanıñ 80 yaşındaki ana-babası edi. İşğalciler ev içinde, çardaqta, azbarda ve garajda tintüv keçirdiler. Tutıp alınğan şeyler arasında: cüzdanlar, cep devterleri ve kitaplar. Tintüv vaqtında arbiyler, Geniçesk rayonınıñ devlet memuriyeti reisiniñ muavini, Milliy Meclis azası Gülnara ve Ukrayina ombusmanı öfinsinde qırımtatar halkhınıñ meselelerinden mesleatçı olğan qızı Eleonora aqqında sorağanlar ve olarnıñ deral evlerine qaytmasında israr etkenler", - dep haber etti Denisova.
Ombudsmannıñ malümatına köre, Gülnara Bekirova şimdi Kıyivde hastahanede "uzun müddet vaziyeti ağır olğan" aqayı Edem Bekirovnıñ yanındadır.
"İşğalci memleket qırımtatarlarnı taqip etmege ve qorqutmağa devam ete. Tintüvler halqara uquqqa zıt kele ve insan aqları ve serbestlikleri aqqında Jeneva Şartnamesiniñ 5-nci maddesini boza", - dedi Denisova.
Rusiye quvetçileri tintüv keçirilgeni aqqında açıq şekilde haber etmedi.
Rusiye kontrolindeki Aqmescit mahkemesi 2021 senesi iyün ayında Edem Bekirovnı 7 yıl apis cezasına ve 150 biñ para cezasına üküm etti. Bekirov, bu üküm «halqnı qorquzmaq» içün çıqarıldı, dep qayd etti.
Ukraina Yuqarı Radasınıñ insan aqları vekâletlisi Lüdmila Denisova Bekirovğa çıqarılğan ükümni takbih etip, halqara toplulıqnı «Rusiyege basqı yapmağa» devam etmesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
