Qırımnıñ uzaq bir köyünde Aqmescit ya da Aqyardan farqlı bir şekilde olacağını kimse beklemey. Yani köylüler, resmiy olaraq "tam azırlıq" rejimi denilgen karantin tedbirlerini pek de kütmey, olarğa pek de uymay.
"Bilesizmi, adamlar mesüliyetlice oldı, tışarıda boş-boşuna kimse kezmey", - dedi telefon lafımızda Aqmescit rayonınıñ Çoyunçı (Urojaynoye) köyüniñ sakini Yelizaveta Kubrak. - Kimerleri bostanlarında qarmalana, ebet. Tükânğa ve kommunal ödevlerini yapmaq içün poçtağa baralar, maska taqalar. Poçtağa tek beşer adam yibereler. Men de özüme marlâdan maska tiktim ve afta bir kere barıp ötmek ala. Adamlar bir-birine pek yaqınlaşmay, uzaqtan el sallaylar".
Çoyunçı köyündeki vaziyet, men anda bir yarım ay evel barğanımda olğanı kibi qala, demek.
Ebet, o zaman Qıtaynıñ Wuhan şeerinde başlanğan koronavirus epidemiyası aqqında adamlar az bile edi ve onıñ sebebinden aslı qasevet etmediler.
Bütün 2019 senesi be soñra koronavirus izolâtsiyasına qadar olar hastahane içün küreşe edi. Hususan, eski ambulatoriyanı tamir etmek ve soñra evelkisi kibi qullanmaq ricasınen çeşit rayon ve cumhuriyet müessiselerine muracaat ete ediler
Olarnı, daa doğrusı - Yelizaveta Kubraknı ve daa bir qaç köy pensiyalını, - 2018 senesiniñ soñunda qapatılğan ambualtoriyanıñ taqdiri raatsızlay edi. Bütün 2019 senesi be soñra koronavirus izolâtsiyasına qadar olar hastahane içün küreşe edi. Hususan, eski ambulatoriyanı tamir etmek ve soñra evelkisi kibi qullanmaq ricasınen çeşit rayon ve cumhuriyet müessiselerine muracaat ete ediler. Bina qaviy, yerleşmesi qolay ve ilâhre. Qırımnıñ rusiyeli Sağlıq Nazirliginde, aksine, bunen razı degiller. "25.06.2018 tarihli №33/18 tehnikiy neticege köre, bu tibbiy ambulatoriyasınıñ binası qaza alında kibi tanıldı. Böylece, bozuluv telükesi bar", - denile Qırım sağlıq naziriniñ birinci müavini Valentina Savçenkonıñ cevabında.
3,3 biñden ziyade adam yaşağan çöl köyünde bütün bu vaqıt tibbiy müessisesiz nasıl yaşadılar? Yoq, andaki adamlar bütünley ekimsiz qalmadı. Şimdi mütehassıslar hastalarnı Çoyunçıde üç türlü yerde qabul ete, bundan ğayrı qomşu Çüyke (Çaykino) ve Beki Eli (Jivopisnoye) köy hastahanelerinde. Söz sırası, soñkisine Çoyunçınıñ ekinci bölügi dep aytalar. Em de Çoyunçıda pediatr, baş ekim ve tiş ekimi adamlarnı köy şuraşınıñ ekinci qatında qabul ete.
Tibbiy yardımnıñ böyle "coğrafiyası" ve bunıñ neticesinde peyda olğan qolaysızlıqlar, tuvğan ambulatoriyasına alışqan köylülerniñ raatsızlıığna sebep oldı.
Adamlarnıñ şikâyetlerini, bazen közyaş ile, men ekinci yıl çalışmağan tibbiy müessiseniñ binasınıñ yanındaki skverde oturıp diñledim.
Maña ambulatoriyanıñ boşalğan odaları ve ayatlarını kösterdiler.
O yerde ne içün Aqmescitteki sağlıq nazirligi teklif etken yañı modul hastahanesini qurmaq degil de, eski ambulatoriyanı tamir etmek kerek olğanınen bağlı delillerni eşittim. Delillerni aynı şu Yelizaveta Kubrak ve köydeşleri İvan Gumenük ve Raisa Şokolenko ketire edi.
Köyde daa bir eşilgen bina bar - keçmişte sovhoz yataqhanesi edi.
Bu qurulış köyniñ merkezinde, köy şurasınıñ artında tura. Şimdi o çöplüklikke çevirildi.
Karantinden evel Çoyunçını Aqmescit memurları ve Rusiye Devlet Dumasınıñ mebusı Konstantin Baharev ziyaret etti. Köy şurasınıñ memuriyetiniñ bundan haberi oldı, olar köy merkezinde cıyıştıruvnı teşkil etip, ziyaretke azırlandılar. Köylülernen köy Medeniyet evinde qonuştılar.
Anda ekseriyetle sadıq sakinler davet olundı, dey Yelizaveta Kubrak. Ve kene de, keçken senede kibi, adamlarnı Çoyunçıda modul ambulatoriyası olacaq, dep işandırdılar, buña para ayırılğan dep ayttılar. Ve atta bir qaç leyha resmini kösterdiler - köy merkezinde boş meydançıqta turğan bina. Bir vaqıtları mektepni qurıp başlağan yerde.
Maksim Denisov, Qırım blogeri
«Blog» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün