Maye Mustafayeva, “Qırım birdemligi”niñ faali Server Mustafayevniñ apayı, onıñ ömür arqadaşı Aqmescit SİZOsında tutulğance, onı tek eki kere, mahkeme oturışlarında, körgenini aytıp berdi.
Bunıñ aqqında o öz Facebook saifesinde yazdı. “Menim ömür arqadaşım, Mustafayev Server, Aqmescit SİZOsında olmaycaq şaraitte tutulğanı endi yarım yıl oldı. O anda bulunğan bütün vaqıt devamında biz tek 2 kere, sıñırlama tedbirini uzatlaşüv mahkeme oturışında körüştik. Mahkeme oturışı devamında Server ve başqa siyasiy mabüslerni “akvarium”de (mahkemelengenler içün şeffaf qutu - QA) tutalar. Laf etmekniñ çaresi yoq, çünki “akvarium”nı er taraftan konvoy qaravullay”, - dep yazdı Maye.
Onıñ aytqanına köre, bütün apis müddeti devamında o iç bir kere körüşüv ruhsetini alıp olamadı.
“Körüşüvde tahqiqatqa basqı yapa bilemiz dep, ricamızıznı red eteler”- qoştı Maye.
Bağçasarayda yaqalanğan qırımtatar faaliyetçileri Server Mustafayev ve Edem Smailov 2018 senesi mayıs 21-nde tutılıp alındı. Olarnıñ davasını Bağçasaraydaki «Hizb ut-Tahrir davası» ile birleştirdiler.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiye ve 2014 senesi ilhaq etilgen Qırımda adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Как живет семья арестованного Сервера Мустафаева (фотогалерея)
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
