Bağçasarayda yaqalanğan qırımtatar faaliyetçileri Server Mustafayev ve Edem Smailovnıñ işlerini Bağçasaraydaki «Hizb ut-Tahrir işi» ile birleştirdiler. Onıñ çerçivesinde 2017 senesinde altı kişi tevqif etilgen edi. Bunı Qırım.Aqiqat Radiosı efirinde Qırım advokatı Ayder Azamatov bildirdi.
Onıñ aytqanına köre, Mustafayev ve Smailov ifade bermekten vazgeçti.
Advokat: «Mende olğan malümatqa köre, mayıs 22-de Aqmescitniñ Kiyevskiy rayon mahkemesinde tahqiqatnıñ sıñırlav tedbiriniñ saylanması aqqında muracaatı baqılacaq. Adet üzre, böyle maddeler boyunca tahqiqat izolâtorında eki ay tutulmasını soraylar, mahkemeler ise bunı isteknen qarşılaylar. Bu, 205.5 maddesi, ekinci qısım – Rusiyede terroristik tanılğan teşkilâtta iştirak etüv. Onda tayin etilgen ceza – cöreme ile 10 yıldan 20 yılğa qadar azatlıqtan marum etüv… Tahqiqatçılar bu işlerni, daa 2017 senesiniñ oktâbrinde yaqalanğan Bağçasaraydaki altı yigitniñ işinen birleştirilmesine dair qararlarnı endi çıqardılar. Böyle protsessler, adet üzre, qapalı rejimde keçe», – dedi.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti. Aynı şu künü Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi. Yaqalanğanlarnıñ adları bildirilmedi.
2017 senesiniñ oktâbrinde Rusiye telükesizlik hadimleri Bağçasaraynıñ altı sakinini tevqif etti. Bular – Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. FSB olarnı Rusiye ve onıñ tarafından ilhaq etilgen Qırımda yasaq etilgen «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar olğanını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri taqip etilgenini qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.
